O le Afioga Fautuaalii poo le fetalaiga Masuisui a le Malietoa Sam Partsch e mai i le afioaga o Saleimoa, sa auai atu i se savaliga e tusa ma le 100 kilomita le mamao – Oxfam trail walker (o se tasi o suega seleni pito sili ona telē i Niu Sila) sa faataunuu i le aai o Taupo i le aso 10 ma le 11 o Aperila.
O lea faamoemoe na faaautū i le sailia o se seleni e faatino ai galuega fesoasoani a le Oxfam mo atunuu tauatiae e pei o lo tatou atunuu pele o Samoa.
Sa tele ni fesoasoani a le Oxfam sa faia foi mo Samoa i le taimi o mafatiaga o le Tsunami, e ala i le faaleleia o alavai (drainages), faamamāina o vai taumafa, alapaipa ma isi fesoasoani e tele e le gata i Samoa, ae o le tele o isi atunuu tauatiae ma matitiva o le lalolagi.
E silia i le 3,000 tagata sa auai i lea faamoemoe ma na latou ausia le 100 kilomita i le 26 itula – na amata mai i le 6.00 i le taeao o le Aso Toonai (10 o Aperila), seia oo atu i le 8.00 i le taeao o le Aso Sa (11 o Aperila). E 26 itula o lenei savaliga e aunoa ma se moe, se‘i vagana ai e faa 7 ona faia ni nai malologa e ta‘i 10-15 minute le uumi.
O i latou sa iai i le vaega a Masuisui, o Elaine Tagaloa, mai le afioaga o Afega ma Sataoa, Simone Louw ma lona toalua o Martin Louw mai i Pretorius i Aferika i Saute.
E tele ni manu‘a (tulou) na latou faafeagai ai i le 26 itula i le latou savaliga. Ae sa maua pea le malosi ona o ni text faamalosiau mai ia latou uo ma aiga sa alo tapuaia lo latou faamoemoe, faapea foi ma le latou vaega lagolago (nurses, physio, support walkers ma isi mai le vaega a le Procare PHO ma aiga).
“Ou te faamoemoe o le a toatele nisi e latou te opogiina ma lagolagoina lenei faamoemoe tāua i le lumanai, aemaise lava Ekalesia o loo i lalo o le polokalame a le HVAZ (Healthy Village Action Zones) ADHB”.
O lea Poloketi o loo faatautaia (HVAZ Zones Coordinator) e le Tofa ia Masuisui Sam Partsch.
