E vevela lava faiga a le tau malulu e ono faatutugata ai le agai o tagata e faaauau pea galuega mo le mautinoa o le tausiga o le soifua maloloina lelei, ae e lei faavaivai ai lava nisi o i latou ua talitonuina le lelei ma le tāua o le naunau pea ina ia faaauau galuega e faatino ai le tausiga o le soifua maloloina lelei pei o le siva (Zumba), o le savali ma le faaaogāina o le taumafaina o le vai o le Herbal i aso uma.
Na mae‘a le polokalame muamua i le masina o Me ona toe faaalu loa lea o le isi tauvaga o le lusiina o le mamafa ma le tino lapoa mai le masina o Iuni seia oo mai i le afiafi o le Aso Toonai lea na faia ai le laugatogi (prize giving), na faafoeina lava e le susuga i le faifeau ia Tim Salamasina Toilolo ma lona faletua ia Fepuleai Lagi Toilolo.
O se polokalame lelei tele ma le faamoemoe matagofie tele lenei o loo faagasolo pea auā o lea ua molimauina ma le mautinoa le tele o le suiga o le vaaiga ia i latou o loo faaaogāina lenei auaunaga tāua.
O le maitau atu e faigofie lava ma vave ona toe (gain) oso le lapoa ma faaopoopo le mamafa o le tino pe a tuu ma le faaaogāina avanoa o loo maua fua e ala i le polokalame faaauau o loo faia i le aai o Manurewa.
E toatele i latou sa faamanuiaina i le tulaga ua lusi o latou tino ma ua faaitiitia o latou mamafa mai le lusi o puna, ma o se fiafiaga tele lea i nai nei tagata. O se faamalosiau foi lea ia i latou na mafai ona auai atu e molimauina lenei faamoemoe tāua, ma e talitonu o le a faateleina le fuainumera o i latou o le a auai i le challenge lona tolu lea ua saunia mai.
O lea la ua mae‘a le taamilosaga lona lua ae o le a toe amataina le isi challenge i le isi lua vaiaso o lumanai ma o se polokalame tāua tele lenei e faaauau ai pea le mautinoa o loo faatāuaina e nai o tatou tagata le tausia lelei o le soifua maloloina ma le faaitiitia o le soona lapopoa aemaise o le maua ai o le fesoasoani e faaitiitia ai le aafia i ni gasegase le tino.
Momoli foi le faafetai tele ma le faamalo i le susuga i le faifeau ia Tim Salamasina Toilolo ma le faletua ia Lagi Toilolo mo nei avanoa lelei ma le tāua o loo la faia ai lenei auaunaga ma le faamoemoe e oo atu ai le fesoasoani ia i latou uma o loo manaomia ma faaaogāina tatau auā le faaauauina (maintain) o le soifua maloloina i le tino aemaise o le taofiofia mai i ma‘i o le tino.
