Faaauau galuega alofa SVSG Aukilani mo le Toomaga i Samoa

Sui galulue o le SVSG i Aukilani
Sui galulue o le SVSG i Aukilani

E lē mafai ona tuua le galuega faifai pea ale SVSG i Aukilani, Melepone, Brisbane, ma Sini ile faia o sailiga seleni mo le fesoasoani atu lea ile Toomaga i Samoa e pei ona faatinoina i tausaga taitasi. Ole lona tolu ai lea o faamoemoe a lenei faalapotopotoga i Aukilani ua faaigoaina ole Dinner of Hope e saili seleni ai auā lava le fia soosoo tau‘au atu ile galuega fita oloo nafa ma le Toomaga i Samoa ile taumafai lea e faaitiitia le sauaina o alo ma fanau, o tina faatasi ai ma tamā.

Ole afiafi ole Aso Toonai 26 o Novema na molimauina ai le sagisagi fiafia atu o nai tamā ma tina aemaise ole loaloa ole atunuu na faatauina a latou ticket ile faamoemoe lenei ale SVSG i Aukilani, e faailoa atu ai lo latou tutū malosi e lagolago le faamoemoe e pei ona iai le Dinner of Hope a lea faalapotopotoga.

Ua lē gata i o tatou tagata ae ua militino faatasi ai foi ma nisi o tatou uso papalagi ile fia molimauina foi o lea fesoasoani. Sa faapea foi ona faatasi mai ai ma le Konesula ole tatou malo o Samoa, ia Faolotoi Reupena Pogi, faapea le afioga ia Aupito Su‘a William Sio. Faatasi ai ma le Peresetene ole Toomaga i Samoa ia Siliniu Lina Chang, ole Miss Samoa NZ le tamaitai ia Naomi Eta Fruean, ole afioga ia Anae Afa Anae faapea nisi o susuga i faafeagaiga.

Ole afioga ia Tanoai Reupena Tanoai ole sui ole SVSG i Aukilani na ia faatulima ma faafeiloai ia Samoa potopoto ma nisi ole auvalaaulia, ona sosoo lea ma le saunoaga faapitoa mai le Konesula o Samoa ia Faolotoi Reupena Pogi, faatasi ai ma le saunoaga mai le faipule o Magele ia Aupito Su‘a William Sio, lea sa ia faamamafa ai lava le sauaina o fanau.

Ole pine faamau ole saunoaga ale Faipule i lea po, ona ole vaiaso ua mavae na maua ai se pepe ile pitonuu o Magele oloo afiafi ise ie oloo tusia ai le igoa Samoa, ma oloo fai pea iai suesuega i lea mataupu, ae pau le popolega i maua ane foi ose tagata Samoa, ma o nisi ia sauaga oloo taumafai iai le malo e fai iai se fuafuaga auā le manuia o tagata.

Ole saunoaga mulimuli na saunoa ai le peresetene mai Samoa ia Siliniu Lina Chang e momoli ai lona agaga faafetai i uso ma tuagane oloo faamaopoopoina lenei faamoemoe i Aukilani amaise ai ole mamalu ole atunuu ua mafai ona lagolagoina le faamoemoe i lea po.

Ole afioga ia Sala Sauoo ose tasi o sui ole SVSG na saunoa faapitoa e fai ma sui o lenei mafutaga i Aukilani e momoli le agaga faafetai ile mamalu ole atunuu ua mafai ona faavanoa o latou taimi e molimauina ai le Dinner of Hope i lenei tausaga.

Na iloga ona sasae le mata ole aitu i lea afiafi i faafiafiaga eseese a loomatutua ma toeaiina ile tu‘itu‘i o musika ale faili faatasi ai ma le mālie ole fofoga ole po le tofa ia Seumanu Francis Ioane na faaasoasoaina le polokalame ma le taumafataga.

E $30,000.00 le aao mafola ole atunuu sa tauaaoina, ma o lenei seleni e tuuina sa‘o atu lava i Samoa auā fuafuaga ale Toomaga i Samoa, ma ose avanoa lelei foi e faailoa atu ai ma talatalanoa atili ai tatou i nei sauaga e masani ona tatou lē fia faalogo iai leaga e matagā. O lenei faamoemoe sa mafai ona tuufaatasia ma faatautaia e nisi o faletua ma tamalii ua mafai ona ofoina lo latou taimi e galulue fua ai e aunoa ma se totogi e fesoasoani ai i lenei faamoemoe lea oloo taitai ai le faletua ia Peseta Pei Leva Aati-Schuster.

Ole latou agaga faafetai foi i nisi o kamupani sa mafai ona lagolagoina lo latou faamoemoe e pei ole Talimanao Catering, G-Mana Wholesale Autos, Pacific Ezy Money Transfer, TAHA Well Pacific Mothers and Infants Jacinta Faalili-Fidow, Penina Health Trust, Loine Lealaiauloto, Vatikano, MSL Training, ma le Marist Girls College.