Ua silia ma le to‘a 600 alii ma tamaitai o Samoa ua foi mai i le malo tele o Saina i avanoa ua mafai ai ona faalautele lo latou tomai i soo se tomai auā le faaleleia o a latou auaunaga i le atunuu.
O se polokalame ua faamalosia e Saina ina ia ofo atu ai ia i latou o loo galulue i le malo i ofisa eseese faapea ai i latou i faalapotopotoga tuma‘oti. E ese mai lea i sikolasipi ta‘i lima tausaga ua ofo atu i isi foi tagata faigaluega o loo saili faailoga i isi foi tomai aemaise i le malamalama i tekonolosi faaonapo nei.
O le vaiaso na tea nei na valaauina ai e le tamaitai amepasa o Saina, Li Yan Duan le mamalu o alii ma tamaitai o le atunuu ua foi mai i aoaoga pupuu nei ua faatautaia e lea malo.
O le mau a le tamaitai amepasa o se auala lenei ua toe faamanatu ai i le toatele o tagata faigaluega i Samoa nei le taua o lo latou sao i le atina’e o Samoa i soo se vaega o tautua a le Malo ma faalapotopotoga tumaoti ma o le maua o avanoa puupuu e faatino ai aoaoga nei i fafo, ua manatu le Malo tele lenei o le a saga faaleleia ai soo se tautua a le Malo.
E to’atele ua mafai ona agai i lea atunuu i lea tausaga ma lea tausaga ma o aoaoga nei e amata atu i le ta’i lua vaiaso seia oo i le tai ono masina le uumi ma ua to’atele ai foi i latou i Samoa ua mafai ona ofi atu i le asosi lenei o tagata ua mae’a aoaoina i Saina aua le faalautele atili ai o nei tomai i le agai i luma.
E le gata la i le agai atu o i latou mai i Samoa i aoaoga nei ae o le toatele foi o tagata faigaluega ua iai le tomai i le tele o galuega e pei o le faa fomai, o faiaoga o taaloga, o i latou e galulue i faatoaga aemaise foi le unai o tomai faa tekonolosi, o loo ua malaga mai i Saina aua ia galuega ma o se fesootaiga ua faafetaia e i latou na maua le avanoa e malaga ma nonofo ai i lea atunuu i le faalautele ai o le tomai aua le faaleleia o auaunaga i Samoa nei.
