Ua toe faaauau nei le faiga paaga a le Kamupani Telefoni Feaveai, le BlueSky ma Samoa International Events (SIE).
O le toe faaauau ai o lea faiga paaga, na faatautaia ai le sainigalima a le Faatonu a le SIE ma lē o loo faafoea le Kamupani i le taimi nei, i le ofisa o le BlueSky i Maluafou, i le Aso Lua 3 Mati 2015.
O le tolu ai lenei o tausaga o faatautaia pea le faiga paaga lea, e pei ona amata mai ai i le tausaga e 2013.
E $45,000 le seleni lea ua faamatuu e le Kamupani, e lagolagosua ai i le faafoega o fuafuaga aemaise o taaloga a le SIE.
O le faamalieina ai o le Kamupani o le BlueSky i le faatautaiga o taaloga i le tausaga ua mavae, lea na a‘e ai se tofa i le Pulega a le kamupani, ina ia toe faaauau le faiga paaga, ina ia tumau pea le lagolago a le BlueSky i le atinaeina o itu tau i taaloga i totonu o le atunuu. O taaloga e pei ona lagolagoina e le kamupani, o le taaloga tamoe lea e pei ona faatautaia e le SIE, lea e auai mai ai ma nisi o tagata tauva mai atunuu i fafo e tauva ai.
Na ta‘ua e le Pule lē Tumau a le BlueSky, Susuga Alex Abraham e faapea, o le tuuina atu pea o le lagolagosua a le BlueSky i le faafoega o lea taaloga i Samoa, ona o le naunautaiga o le kamupani ina ia atiae le agavaa o loo i o tatou tagata i le faatautaiga o lea foi taaloga i totonu o le atunuu.
O le alii o Darren Young ma Daniel Afoa, o tamafanau ia a le atunuu, ua iloga le faamalieina o le tulaga o le la taaalo ai i le tauvaga lea o le tamoe i maila e lē gata o totonu o Samoa ae faapea foi i le lalolagi atoa.
I le ave ai o le faamuamua a le kamupani i lea polokalame, o se avanoa tāua foi lea, e unaia ai tupulaga talavou o le atunuu, ona o le tulaga lelei sa vaaia i nisi o alo o le atunuu na auai i lea tauvaga, i le naunau ina ia faaleleia atili le taleni o le tamoe, o le faaopoopo lea a le alii pule o le BlueSky.
O le ala lea e pei ona ta‘ua e Alex, ua toe faaauau ai pea le faiga paaga lea ina ia toe aumai ai lea taaloga e faafoe i totonu o Samoa.
Na momoli le agaga faafetai o le Afioga i le Faatonu o le SIE, Susuga Seti Afoa ona o le lagolago pea a le Kamupani a le BlueSky i le faafoeina o lea taaloga i totonu o le atunuu.
“Faafetai i le Pulega ma le Aufaigaluega a le BlueSky, ona o lea ua atoa le tolu tausaga o la tatou faiga paaga, ma ua sologalelei foi le faatautaiga o lea taaloga, ona o la outou lagolago mai.”
Na faaalia e le susuga ia Seti le sao o le kamupani o le BlueSky i le taumafaiga a Samoa i le faatautaia ai o lea taaloga, ua le gata ua mafai ona tauva mai ai tagata o isi atunuu o le lalolagi, ae o loo maua foi le avanoa mo tupulaga talavou a Samoa e atiae ai a latou taleni tamoe.
“O lea e faafetai ai i le BlueSky ona o le tou manatu ia Samoa ma ana tamafanau i le taumafaiga o a latou agavaa i le faafoeina o lea taaloga.”
O loo faaauau pea lea tauvaga e pei ona mae‘a ai le vaega muamua, lea na faatautaia i le tausaga ua mavae, ma o loo faaauau pea seia oo i le masina o Iulai 2015.
