(Faauuina Laupepa & Natasha Vaaelua avea ma Faatonu o le Musika a le Ekalesia Aoao Elshadai Worship Centre)
O pule uma lava ma tofiga e mai le Atua ia. O le faamanuiaina e avea ma taitai o se tulaga e faagaeetia ai ma lagona ai le loto faafetai ma vivii a‘e i le Atua, auā ana lē seanoa lona auai e faia fua le auaunaga a le tagata.
Ua tofusia i tatou ma le valaauina, na fausia foi i tatou ma le manulauti paia ia avea i tatou ma viiga o le silisili ese. O le toe ofoina atu o taleni ma meaalofa ua faatamaoaigaina ai i tatou e ala i le tautuaina o lana galuega o la tatou auaunaga lea i le Atua.
O le susuga ia Laupepa Vaaelua na amata mai lana tautua i le musika i viiga o le Atua i totonu o le Ekalesia Faapotopotoga Kerisiano Iesu i Samoa faapea ma le galuega a le autalavou mo Keriso (YFC Samoa).
O le tuua ai o aiga ma nuu ma le Ekalesia i Samoa ae aumau i Niu Sila nei, o se faamanuiaga lea mai le Atua e ala i le tautuaina o lana galuega i le tapenaina o viiga o le Atua aemaise le faasoa atu o le taleni ma le silafia i ē o galulue i lea auaunaga.
O loo galulue nei ma lona faletua o Natasha o le alo e faasino i se tasi foi tamalii iloga i le musika, le susuga ia Willie Tavita, i le Ekalesia ua faaigoaina o le Elshadai Worship Centre.
O le faitau aofai pe ā ma le 400 tagata lotu mai atunuu eseese ae mafuli lava i tagatānuu o Aferika i Saute. O le Aso Sa la o le fanau sa faia ai se sauniga faapitoa e aloaia ai ma faauuina i laua e avea ma faatonu o le musika a le ekalesia aoao. O se tulaga faagaeetia lea ma lagona ai le agaga faafetai i le Atua ona o se matatia ma se tulaga maualuga foi lea ua faaeaina ai ma ausia aemaise i tapuaiga ese mai nai lo tatou lava tagatānuu.
O susuga i faafeagaiga o Pastor Friday and Pastor Diana Mwale Fambylwa na taitaia lea sauniga faatasi ai ma toeaiina o le ekalesia. O se luitau foi lea mo uso a auauna i lea matata ina ia faamalosia pea i galuega lelei uma mo le viiga o lo tatou matai o i le lagi.
