Le taimi ole ava ole Feiloaiga

Le taimi ole ava ole Feiloaiga

Ole tasi lea vaaiga sili ona siitia maualuga ai le fale o Samoa ile polokalame ole Pasifika Festival i lenei tausaga, ole taimi na faatinoina ai le ‘ava ole feiloaiga i malo faaaloalogia na vaalaulia faapitoa ile Pasifika Festival. O fanau ile ta’i 8 tausaga ile 11 tausaga sa gafa ma le tautuina ole ‘ava faapea le galuega atoa ile taeao ole Aso Toonai na tatala aloaia ai polokalame ole Pasifika Festival.

Ose vaaiga sili ona matagofie ile silasila a mātua faapea i latou sa molimauina lea taeao ile faaaogāina o fanau e ala ile latou faatāuaina o measina ale atunuu faapea lo latou faasinomaga. Ole taimi muamua lenei ua taoto mai ai se faataitaiga lelei ma le a’oa’oga lelei mo le tele o mātua ma fanau oloo tuputupu a’e i totonu o lenei atunuu.

Ole agaga faafetai foi lea ale afioga ile Minisita ia Aupito Su’a William Sio ia i latou sa tapenaina lenei faamoemoe ona ole tofa alualu mamao ma le silasila ile lumanai manuia o fanau lalovaoa aemaise ole faaaogāina o nei fanau i polokalame tetele faapenei. E ese mai lava Samoa mai le tele o atunuu ole Pasifika sa auai i lenei faamoemoe ile faaiuga ole vaiaso, ae ole suiga tele foi lea oloo molimauina pea ile tele o tausaga.

Afioga ile Minisita Aupito Sua William Sio, Rev Masunu Utumapu, Tausala ole Pasefika, Tausala o Samoa  ma se tasi o malo faaaloalogia

Afioga ile Minisita Aupito Sua William Sio, Rev Masunu Utumapu, Tausala ole Pasefika, Tausala o Samoa
ma se tasi o malo faaaloalogia

E tatala polokalame ile sauniga lotu e pei ona avea ai le susuga ile faafeagaiga ia Masunu Utumapu ole Sea foi ole Sinoti i Matu ma ositaulaga ile faamoemoe o lenei tausaga, ona sosoo lea ma le ‘ava ole feiloaiga e pei ona masani ai Samoa i ana tauaofiaga faapenei.

Matagofie ma maualuga le fale o Samoa i ana polokalame ona sa mafai ona auai mai ai le Miss South Pacific le tamaitai o Matauaina Toomalatai, faapea le Miss Samoa mai Samoa le tamaitai ia Alexandra Iakopo, ma le Miss Samoa i Niu Sila le tamaitai ia Natalie Toevai ma le Miss Tonga New Zealand.

E felanulanua’i taumafataga i taumafa Samoa na saunia e le tele o mafutaga ma aiga faapea faalapotopotoga sa faatauina a latou taumafa i nei aso e lua. E ui ile louloua ole tau ile Aso Toonai, ae sa lē tuua ai le taupati atu ole mamalu ole atunuu e molimauina le tele o faafiafiaga eseese na saunia e aufaafiafia mai aoga sa lautogia i polokalame ole Polyfestival ile vaiaso ua mavae, Avondale College, St Pauls College ma Mt Albert School, faapea nisi o ausiva sa filifilia ile Pacific Festival i lenei tausaga. Na iai foi ausiva na malaga mai Ausetalia ona ole naunau lava ole pulega ole Stage a Samoa ina ia siitia maualuga pea le tulaga o Samoa i ana polokalame.

Nesian Pearl

Nesian Pearl

Ole tauasaga lenei na malaga mai ai le tele o pisinisi mai Samoa e faalauiloa le tele o a latou oloa oloo gaosia ma faatauina i Samoa ma ose auala lelei foi lea ua mafai ai ona faalauiloa ai oloa a Samoa i tagata ole lalolagi oloo mafai ona faatasi atu ile Pasifika Festival.

Ae na faailoa se finagalo ose tasi o alii ole kamupani ale Roger Island Wear, o tausaga uma lava e siisii ai i luga le tau o mea oloo latou faaaogāina ile Pasifika Festival auā a latou oloa faatau, ae e lē mafai ona foi ai le latou pisinisi ile tau oloo aumai, auā oloo vaaia le lelei ole polofiti e maua mai ai ale kamupani.

U a 26 nei tausaga ole Pasifika Festival e pei ona faamanino ele afioga ia Seumanu Simon Matafai ile faatalatalanoaga ma le susuga ia Seumanu i luga ole Radio Samoa ile faaiuga ole vaiaso ua mavae. Aemaise ai ole toe foi mai lea ole Pasifika Festival ile pulega ale Auckland Council e fuafuaina ana polokalame i tausaga taitasi lea ua amataina ile tausaga nei, auā ole tele o tausaga ua mavae sa faakonekarate ai ele isi kamupani palagi.

Ma ole tāua la ole toe foi o polokalame ile Auckland Council ua mafai ai ona toe faatinoina lava e tagata Samoa ma tagata Pasifika lava latou.

Pei ole fale o Samoa lea sa mataina ai le tele o faafiafiaga suifefiloi ma le tåina ole tatau a Samoa lea sa faatinoina ai lava ile Aso Faraile.

Lagi Letoa, se tasi o tina faipisinisi Samoa

Lagi Letoa, se tasi o tina faipisinisi Samoa