O alii ma tamaitai o le Aoga Tusiata a le Iunivesite Aoao o Samoa ua mae‘a nei se latou galuega tele o le toe vali atoa o le nofoaga lea e iai faleoloa o le maketi i Savalalo auā le faamatagofie ai o le taulaga o Apia i le feagai ai ma le taligamalo o le SIDS poo malo laiti tau atia‘e o le lalolagi lea e faia mai i Samoa nei.
O le kamupani gaosi faguinu ma le ‘ava le Samoa Beverages Company i Falelauniu na faapea ona tau saili sona sao i le galuega ua pulupululima uma i ai afioaga, aulotu aemaise o kamupani eseese i Samoa mo lana taligamalo o loo faagasolo nei ma na ta‘ua e sui o lea kamupani na agai ane i tua o le flea market i Savalalo lea e faitau afe tagata e afea ma faaaogāina i aso uma ma vaaia ai tulaga faaletonu o faleoloa o loo iai ona o le palapala. Ua avea le tumutumu o lea nofoaga i aso uma ma mafuaaga o le palapala ma ua manaomia le toe faamamā atoa.
O lea na agai ai loa sui o lea kamupani i le aoga tusiata lea e i le Iunivesite Aoao o Samoa ma talosagaina nisi o alii ma tamaitai faaiu aso ina ia vali atoa lenei nofoaga ma o se auala foi ua faaaogā ai loa le faguinu o le taxi ma faalauiloa e vali ai i ona lanu eseese nei faleoloa.
Ua mae‘a le galuega ananafi ma o se vaaiga matagofie ua iai nei lea nofoaga ma le faamoemoe la ia lelei atoatoa mai le faamamāina o le otaota e toatele e soona lafoai lava i tua ane o le maketi ma ua faamalosia talosaga i le atunuu e faaaogā kalone lapisi o loo i lea nofoaga auā le tumamā moomia i le taligamalo lenei.
O le faamoemoe foi o i latou ua faia lenei galuega ina ia amanaia e le toatele o le au faatali pasi ina ia faaauau ai le teuteu o nofoaga faitele nei aemaise o le toatele o tagata o le fono o le a afea le maketi i Savalalo mo le faatauga o laei ma galuega taulima Samoa.
E lei mafai ona saunoa mai le faiaoga o le aoga tusiata a le NUS pe fia se tupe na avatu e le SBL ia i latou mo lenei galuega ae ona pau lana faamatalaga o lea e faatupe uma vali e le kamupani gaosi faguinu ma o i latou ua faia lenei galuega o alii ma tamaitai o le vasega faaiu o le tikeri o le faatufugaga, lea e sue faatasi foi lea tomai ma le tikeri faafaiaoga ma o iina lea ua agai i ai i latou nei i le tausaga fou pe a faauu, o le faiaoga i le tomai lenei i a’oga poo Kolisi eseese i totonu o Samoa.
O loo aofia foi i latou nei i le faaaliga o ata tusia ma galuega ua vane ai laupapa ia e faatulaga faatasi ma galuega faapea a le Aoga Tusiata i Leulumoega i le nuu Samoa lea e faatuina i totonu o le nofoaga tutotonu o le fono a le SIDS i Tuana‘imato.
