Faaaogā tatau avanoa ua maua – Faauuga MIT 2018

E 51 alo ma tamafanau o Samoa sa faauuina i faailoga eseese ile Manukau Institute Technology ile afiafi ole Aso Faraile ua mavae 9 o Mati ile Vodafone Event Centre i Manukau. O lea faauuga, sa faapitoa lava na’o tagata Pasefika e aofia ai Niue, Fiti, Tuvalu, Cook Island, Tonga ma Samoa. Ae o ia atunuu eseese ole Pasefika, e aupito i maualuga ai lava le fuainumera o tamafanau a Samoa ua faaiuina lo latou taumafai mai faailoga eseese sa latou aotauina auā le sailia ole lumanai manuia ole aiga.

O lagona ole fiafia ma talotaloga ole faafetai ile Atua, ile aufaauu aemaise o aiga uo ma ē masani sa auai i lea afiafi, ona ua iu ma le manuia tausinioga sa finauina e tamafanau a aiga mai ile ta’i 2 tausaga sa aotauina ai, agai atu ile ta’ilima tausaga ia i latou ua maua le faailoga ole Master. Ua tele faamalo ma faafetai sa molimauina e atunuu taitasi e ala ia latou lava gagana, ae taui ia lagona uma ile saunoaga ale susuga ile faafeagaiga ia Rev Salafai Mika ile faaiuina ole polokalame e faapea, “Ole taunuuga ole aso, ole amataga lea ole isi laasaga fou.”

Maualuga ma matagofie le aso fiafia o tagata Pasefika i totonu ole MIT i Manukau ona sa auai le tele o sui maualuluga o atunuu taitasi e molimauina le lelei ole Atua i lea afiafi. O Samoa sa faatasi atu iai le afioga ile Konesula ia Faolotoi Reupena Pogi, Hon Aupito Su’a William Sio, o susuga i faafeagaiga faapea sui o Local Boards o itumalo taitasi.

Ole faletua ia Seugagogo Fololi Lologa Iosua sa ia fofogaina sui o Samoa sa faauuina, ae ole afioga ile Minisita ia Aupito Su’a William Sio sa autu iai le saunoaga o malo faapitoa ole po. Saunoa foi le afioga ia Peseta Sam Lotu Iiga i lona agaga faafetai ma le faamalo ile aufaauu uma lava ile latou galuega faigata sa finau iai ile tele o tausaga ae o lea ua faaiuina ma le manuia e viia ai le Atua.

Faaaogā Avanoa ua Maua

E soisoi le faletua ia Maria David ma faamatala lona aiga. O ia ua 62 ona tausaga, e toalua lana fanau ma ana grandchildren e toaiva ae ua leva ona moemiti e fia alu e fai sana course auā le lumanai mo ia. Ole manaoga e lei faigofie ona tau amata auā ana lē matutua lana fanau e lē mafai ona alu loa e saili le poto salalau auā se galuega.

E ui ile faigata ile tele ole pisi ile aiga, ile vaaiga o lana fanau laiti, ole lotu, tele meaaoga e fai, ae sa tatalo lava ile Atua e fesoasoani mai ile taumafaiga o lana aoga, ia pasi. Lea ua mae’a lana tolu tausaga sa ia tauaveina ai le Bachelor of Applied Social Science, o lana faafetai lea ile Atua mo lona aiga ile lagolago malosi, aemaise o faiaoga sa faamalosia lona loto ile aoga.

Tele o taimi e fai uma ele tamā ma lana fanau feau ole aiga ae tuu atu le avanoa ia te ia e sailiili atili ai auā ana meaaoga. E lē faigofie le sailiga ole fasi pepa i Niu Sila e tatala ai le tele o faitotoa o galuega lelei e maua ai le seleni lelei mo le aiga.

Ole faletua ia Lemalu Leativa Lemalu, sa ia faailoa le tāua ole course i lona olaga, auā ole olaga lea mo tagata Pasefika i totonu o Niu Sila. O Samoa e leai se mea e ta’ua ole Counseling, ae i lona talitonuga ile taimi nei, e manaomia lava le tulaga lea mo tatou tagata.

Ole faletua ia Lemalu Leativa ua faauuina nei ile tolu tausaga ile MIT, ae ua faigaluega foi ile Pacific Senior Advance School e avea ose faufautua mo fanau Pasefika auā o lana lea moemitiga na iai.

Ole 24 o tausaga o lona soifua na malaga mai ai i Niu Sila nei, ae lei alu lava ise aoga i totonu o Niu Sila, sa faigata lona aiga ona o tulaga tau i seleni, ae sa lē faavaivai ai lava ile sailiili solo i avanoa e maua ai se fesoasoani. E lei faigofie foi ona faagaioi lana aoga ona o tulaga lava tau i tupe ae ole faamalosi a lona aiga ma faiaoga ole MIT, lea ua taunuu ai ma le manuia lona taumafai i lenei tausaga, ma le isi vaega e tāua le avanoa ua maua i Niu Sila e aoga ai auā le lumanai manuia.

O molimau a nisi o fanau Samoa, o avanoa o mea e lē toe maua, ole mafuaaga foi lea ua aooga ai ona ole tāua o avanoa. Toatele tamaiti Samoa lea e feoai solo, ae o lea e omai tamaiti o isi atunuu faaaogā avanoa ia e aooga ai. E lē gata la ile aogā ile tagata lava ia, ae aogā foi i aiga e maua ai le faasiliga i seleni pe a maua galuega. Aua ne’i fiu gofie ae ia taumafai e faaaogā avanoa ua maua i nei atunuu.