O le maualuga faatulafonoina o le ‘ava malosi e faataga se tagata avetaavale ona ia tagofia e 40 milikalama, peitai o le toatele ua tulai i le Faamasinoga e maualuga tele le pasene o le ‘ava malosi ua latou tagofia.
O se alii talavou na tulai i le faamasinoga ona o lea solitulafono o Ronnie Gibson e 44 tausaga le matua o Malie.
E tusa ai ma le tolaulauga o lea mataupu i luma o le Faamasinoga e faapea, o se asiasiga masani a leoleo i Faleata na agai atu ai i Sisifo i le afioaga o Toamua. Na maua atu ai le taavale sa aveina e lē ua molia o loo tumutumu ai tagata ma e foliga mai e iai se mea ua tupu.
Na tu le taavale a leoleo ma iloa ai ua ova le onā o lē ua molia ma ave ai loa i le ofisa o leoleo i Faleata mo le faatinoina o le masini mānava e siaki ai le maualuga o le ‘ava malosi ua tagofia e lē ua molia.
Faaalia e le itu a leoleo, na faamauina ai e 101 milikalama le maualuga o le ‘ava malosi na taumafa e le alii o Ronnie. O le faalua ona siaki lea tulaga i le masini na iloa ai e leoleo o loo faaaogā e le alii ua molia lona laulaufaiva se‘i tulou e poloka ai le faagaau o le masini.
Na ta‘ua e le Tamaitai Faamasino le Afioga Tuala Leilani Warren, e vaai atu i le tolaulauga a leoleo e leai se faamatalaga e ono faamatala mai ai le ave taavale faatamala o lē ua molia.
O le a lē faia se faasalaga a le Faamasinoga i le moliaga ave taavale faatamala, ae na o lona moliaga o le lē usitaia o le faatinoina o le masini mānava.
O le faasalaga o lea solitulafono e $1,000.00 ae o le a toesea e le Faamasinoga le tasi vae tolu ona ua vave ioe lē ua molia, ma o lona moliaga muamua foi lea ua tulai ai i le faamasinoga.
Ua faatonuina e le Faamasinoga lē ua molia e totogi le sala tupe e $590.00 i le Faamasinoga ma o lona lē usitaia o le faasalaga o le a nofosala ai i le falepuipui mo le fitu vaiaso.
