Ekalesia Samoa AOG Mt Wellington
E ese foi le faaaogāina e le Atua o fanau e molimau i lana Afioga Paia, e ala i le latou Aso Sa Paepae. O le Ekalesia Faapotopotoga a le Atua i Mount Wellington o loo galue ai le susuga i le faafeagaiga ia Poasa Auvele ma le faletua ia Manu Auvele, na maeu le matagofie o a latou sauniuniga i le Aso Sa.
O le polokalame atoa na faatinoina uma lava e le fanau mai lava i lona amataina seia oo i lona faaiuga. Na laei uma e tamaiti le ofu paepae ma pulou i ulu o tamaitai ma amata ai loa ma le solo mai fafo ma savavali atu agai i totonu o le falesa ma usu a latou pese. O se molimau ola ma le toe fafagu i tapenaga a nai fanau i aso ua alu.
O le taitai o le sauniga sa nafa lea ma le tamaitai ia Cassy Sua, tatalo amata o Delilah Jo ma Rosita Faavae, o Talosaga – Faaneeneega na tatalo ai Nellina Vaovasa, Tatalo Faafetai o Viliamu Auvele, tatalo Faatoesega o Agasa Manase, ma Manaoga o Fiasau Precious Amete. O le faitauina o le Afioga a le Atua i le Feagaiga Tuai o Metusela Manase ma Tepora Lalogafau Ioelu o le Tusi a Salamo na faitauina lea e Max S Ameke ma Tuputala Precious Auvele, o le Feagaiga Fou na faitauina e Uasinitone Auvele ma Maylynn Uepa.
O se tasi lea vaaiga pito sili ona tāua i le Aso Sa o le fanau o le faapaiaina o pepe, o fanau laiti e toe faapaiaina ma toe ofo atu i le Atua auā lava lona malo.
O le galuega lea sa faatinoina e le susuga i le faafeagaiga ia Poasa Auvele i le taimi o le sauniga i le taeao, ma toe faaauau ai le polokalame. O le aoina o le taulaga o Fuipua Joseph Tuipala ma Suli Simi, a o le laugaina o le upu a le Atua na fofogaina e Zechariah Fiavae ma Della Tuipala.
O le galue o le agaga Paia o le Atua ma le faaaogāina o fanau e folafola i lana Afioga na lagona ai e mātua i o latou loto feau tau molimoli o le Aso Sa, faatasi ai ma tauloto ma pese a vasega amata, a o le autalavou sa faatinoina ni tala faatino ma ni siva faaleagaga.
Na faaiu le sauniga i le tatalo na saunia e Sharon Simi ma agai ai loa i le Happy Days mo le toonai.
