E iai le talitonuga ole taimi muamua lenei ua faaaogā ai i Aoga ale Malo ni laupapa tusitusi o fausaga o tekonolosi fou faaonaponei mo le aoaoina o fanau. Ose laupapa ua mafai ai ona faaaogā polokalame ile masini komepiuta, e lē toe manaomia ai ele faiaoga se masini faapea ile taimi oloo fai ai lana vasega.
E matautia tele le maoae o ia laupapa tusitusi poo se blackboard ua ta‘ua ise isi ta‘uga ole e-learning screen, ua faameaalofa mai ele Malo o Saina mo Kolisi maualuluga ale Malo.
Ole molimau lava ina ua faataitai ia laupapa tusitusi, ua saoasaoa ai ma tekonolosi e faaaogā e faiaoga e a‘oa‘o ai le fanau auā na‘o le limatusi lava e faaaogā. E na‘o na oomi lava ole polokalame ile limatusi oso ane i luga, toe oomi le limatusi ile faatonuga ole laupapa oso ane faamatalaga e fetaui tonu ma le mataupu oloo aoao ele faiaoga.
E mafai foi ona faaaogā ai le mea pueata ole telefoni feaveai e pue ai ni ata oni vaaiga i fafo ole lotoā ole aoga poo totonu ole potu e faamalamalama atili ai se mataupu oloo aoaoina ele faiaoga.
Ole limatusi foi e oomi oso ane le polokalame e mafai ona tusitusi ai le faiaoga i luga ole laupapa e lē faaaogāina ai se penisina ae o lona limatusi. E lē manaomia ai se solo poo se duster ae na‘o le alofilima lava e solo ai ona faaauau lea ona faaaogā mo ni tusitusiga.
A fia matamata se ata video ale fanau e faaaogā ise mataupu, e na‘o le limatusi foi e polokalame ai ona faaali ane lea ole ata. Peitai ole fautuaga ale alii papalagi ole ofisa autu ole Matagaluega o Aoga i Malifa ua iai le silafia ile faaaogāina ole laupapa tusitusi o tekonolosi fou, e aua foi le fai ma masani ona matamata ai ni ata video e lē fesootai ma mataupu oloo aoaoina e fanau.
Na alu le taliē ale auvalaaulia ma i latou na auai ile faalauiloaina o lea meaalofa ale Malo o Saina, ae ole upu moni e sa‘o le alii papalagi.
E ono Kolisi i Savaii ma le fā o Kolisi i Upolu ua muamua taulimaina ma faaaogā ia laupapa tusitusi, ae ose taimi ole tausaga nei e taunuu ai isi laupapa mo isi Kolisi ale Malo. E leai lava se isi upu na saunoa iai le afioga ile Minisita o Aoga Taaloga ma Aganuu le afioga Loau Solamalemalo Keneti Sio, ina ua tauaao iai ele Amepasa o Saina i Samoa lea fesoasoani tāua, ua na‘o le faafetai ma le faafetai auā e lē ose taimi muamua lea ua tuu atu ai le tau‘au malosi o Saina ile faaleleia ole atinae o aoga ile atunuu.
