Faaaogā e Brock Lesnar fualaau faasāina

Brock-Lesnar
Brock-Lesnar

A‘o loma le la fusuaga ma le “Super Samoan” Mark Hunt, ua faamaonia sa faaaogāina e Brock Lesnar fualaau faasāina. Faatoa faamaonia lea ile aso ananafi e le vaega suesue o le UFC. Ose tulaga ua matuā lē malie ai Mark Hunt, ona o le tolu ai lea o tagata na latou fusu ua faamaonia i suesuega faapitoa na latou faaaogāina fualaau faasāina.

Ile fusuaga ile vaiaso na tea nei aso 9 o Iulai, na manumalo ai Lesnar i ‘ai e 29-27 a Mark Hunt. E lē gata i lea, a‘o le aofai o le tupe na manumalo ai Lesnar e $2.5miliona. Ile faamaonia la o fualaau faasāina na faaaogā e Lesnar, ua talosagaina ai e Mark Hunt le UFC ia avatu mo ia le ‘afa o le tupe na manumalo ai Lesnar. A leai, ona sasae lea o lana konekarate ma le UFC. O le toatamai lea o le alii Samoa ile mea valea a Lesnar na fai.

E lē gata ile faaseā ia Lesnar, ae ua faailoa foi e Hunt, o le tolu ai lea o ana paga ua faamaonia na faaaogāina fualaau faasāina a‘o loma a latou fusuaga. O le mafuaaga lea o le faaalia o le fiu o lenei alii, ile lē fetaui ma le fa‘imamago o ia tulaga.

O le isi toalua na aafia ile tulaga lea na fusu ma Hunt e iai Frank Mir (19 Mati 2016) ma Antonio Silva (14 Novema, 2015) na manumalo uma Hunt i fusuaga ia e lua.

Na ta‘ua e le UFC sa maua mai ile US Anti-Doping Agency (USADA) le faamaonia o fualaau faasāina ile tino o Lesnar, a‘o loma le taaloga male fusuaga ma Hunt. O le aso 28 Iuni le suesuega o Lesnar, ma o le aso 14 o Iulai faatoa maua ai le faamaoniga ae ua mae‘a le fusuaga na faataunuu ile aso 9 o Iulai.

Na faailoa ele UFC, e iai le avanoa e tetee ai Lesnar ise faaiuga ua iai, auā o tulaga lava ia o tulafono ale UFC. E ui la ua maua faaiuga o suesuega, ae e leai se mea e fai seia mae‘a le avanoa o le aiātatau ale tagata taalo i lalo o tulafono a le UFC.

Na ta‘ua foi ele UFC, o le faatonuina o fualaau faasāina ei lalo lea o le vaaiga ale USADA, o le a faatali le UFC ile atoatoaga o suesuega ma faaiuga a le USADA. A faapea e faamaonia le solifulafono a Lesnar, o le a mafai ele UFC ona liliu le faaiuga o le fusuaga mai le manumalo a Lesnar ile faia‘ina.

Peitai, e lē faapea o le a manumalo ai Mark Hunt. O le tulaga foi lea o le faaalia o le toatamai a Hunt ona o le maimau ai o lona taimi e tapena mo le fusuaga, ae faaimamago le toatolu sa latou fetaui e iai Lesnar, Frank Mir ma Antonio Silva.

O le isi faaseā a Mark Hunt, e ui lava oloo tausisi le UFC ile tulafono ma maua ai le ‘au faimamago, ae a maua le vaega lea, e leai ma se mea o faia iai. E uma ane lava, e leai se sala matuia e feagai ma tagata faimamago.

A faapea foi e faamaonia le sala a Lesnar, e lē maua e Hunt le tupe na o le malo lea na totogi ia Lesnar.

O le faaletonu tele lea, auā ana faapea e fai sa‘o le fusuaga e aunoa ma le fesoasoani o fualaau faasāina ile tino o lana paga, semanu e manumalo ai Mark Hunt, ma maua ai ma le tupe lea e $2.5miliona. O lona uiga, ose avanoa e lē toe maua le maua ose fusuaga e malo ai ise tupe tele.

E lei mautinoa se isi fusuaga a Mark Hunt. O le fusuaga ma Brock Lesnar o le tolu ai lea o ana paga ile sefulu male lua masina, e lua manumalo ma le faia‘ina e tasi, a‘o se faia‘ina foi ua fesiligia nei, pe sa tatau ona malo le Super Samoan.