E ui ina sa teena malosi ele tamaitai sa galue ile faleoloa o Frankies i Salelologa tuuaiga ma moliaga e lima ole gaoi a’o avea ma tagata faigaluega ae na taunuu le faamasinoga ile faamaonia o moliaga.
Ole faleoloa siiatoa ma le supamaketi a Frankies i Salelologa sa avea ai le tamaitai o Antonina Pamata Paulo poo Pamata Paulo Pipi Salu ma tagata faigaluega e talaina tupe poo se Kesia. O ia ose tagata faigaluega e maualuga lona aoaoina aua na oo lana aoga ile vasega tausaga 13.
E le gata sa galue le tamaitai o se tasi o Kesia poo le head cashier a Frankies i Salelologa i Savaii ae sa ia vaaia foi le vaega ole kamupani mo tupe faamomoli. O ana galuega ole faitauina o tupe e maua ma faamaumau ma teu ile sefe tupe uamea mo le sauni ai e ave e teu ile faletupe ile aso e sosoo ai.
Afai o tupe e maua ile faaiuga ole vaiaso e faatoa teu ile amataga ole vaiaso fou e sosoo ai. O ia foi e faatumuina le pepa mo le teuina o tupe ile faletupe ae ole Pule ole lala ole faleoloa o Frankies i Salelologa e sainia le pepa mo le teuga tupe. O nisi e tuai atu o ia ile galuega ile taeao pe alu foi ise isi galuega ale kamupani ona tauave lea ele Pule ole Faleoloa ona tiute.
I sailiiliga a leoleo ile solitulafono na tuuaia ai Pamata ina ua toesea ni tupe ale kamupani na faaalia ai e ono moliaga ole gaoi a’o avea ma tagata faigaluega na tuuaia ai le tamaitai. O faamaumauga nei o aso, ma le masina na toesea ai ni vaegatupe ale kamupani.
A silasila i faamaumauga o moliaga e ono faasaga ile tamaitai o Pamata ole aso 8 o Iuni 2016 ole aofaiga o tupe na maua i faatauga ale faleoloa e $15, 515.40 sene. Na teu ile faletupe le $8,650.10 sene. O lona uiga e $6,865. 30 sene le vaegatupe e lei teuina ole aofaiga atoa ole seleni na maua i faatauga ole aso lea.
E faapena foi i faamaumauga o tupe na maua ilea so 10 e oo ilea so 12 ole masina o Iuni ole 2016 lea e 54,773. 70 sene na maua ae na’o le $32,491.10 sene na teu ile faletupe. Ole tupe e lei teuina e $22,282.60 sene. E pei ona faaalia ile faamaumauga ole aofaiga atoa ole tupe e lei teuina e $52,481. 40 sene.
Peitai ole mae’a ona suesueina o molimau a leoleo ma le molimau ale tamaitai o Pamata na faamalieina ai le faamasinoga e le faamaonia le moliaga e tasi ona ua le mafai e molimau a leoleo ona faamaonia ma totoe ai na’o moliaga e lima lea na suia ai le aofaiga ole tupe na tagolima iai lē ua molia ile $45,616. 10 sene.
O tupe na toesea na faaalia e Pamata i se tagata faigaluega ole kamupani sa suesueina muamua le faaletonu sa ia faaaogā e tafao ai. Na faaalia ele faamasino le afioga Vui Clarence Nelson e maoae tupe e tafao lē ua molia. E na’o le ono afe se tupe na mafai ona toe totogi e Pamata ile kamupani mai le aofaiga ole seleni na gaoia.
Ua faasalaina o ia ile falepuipui mo le 4 tausaga. Ole sailiiliga talu ai nei a se savali a Malo Aufaatasi e faapitoa i faiga faailoga tagata ma le aafia o aiātatau o tina ma tamaitai o Samoa, na faamauina ai ole 70 pasene o tamaitai ole atunuu oloo nofosala ile falepuipui e mafua mai i solitulafono ua faamaonia ele faamasinoga maualuga ale atunuu, ole gaoi a’o avea ma tagata faigaluega.
