Faaaloaloga a le itumalo Satupaitea i le Palemene

Na o le sefululima minute na amata ai tauaofiaga a le Palemene lea ua toe faaauau, ae faataatia ese ana galuega ae agai ane e tali le faaaloalo a le itumalo o Satupaitea ona o le filifilia o le faipule o le itumalo, le afioga Lautafi Fio Purcell e avea ma minisita o le kapeneta.

O faaaloaloga o sua taute ma sua talisua na maau i ai le itumalo e pei ona tatala foi ie o au‘afa ma ie o moegalafo, e faatino ai le tautua malo ma le tutua atunuu aemaise o le silasila i le tofi faipule ona o le agaga o le fiafia ma le faafetai ua faaeaina i se tofi minisita le tofi o Satupaitea.

O le taumafataga foi na saunia e le itumalo na tali ai le sua ma taumamafa le Palemene aemaise o ulu o matagaluega ma faalapotopotoga a le Malo. E limaafe le meaalofa a le Palemene mo le itumalo faaopoopo i ai ma le meaalofa a lo latou faipule e tasi le afe tala.

O le afioga Lautafi Fio Purcell na filifilia i le tofi minisita o le kapeneta ina ua faamavae le faipule o Palauli le Falefa sa avea ma minisita o tupe le afioga Faumuina Tiatia Faaolatane Liuga. Na toe faaauau galuega a le fono aoao faitulafono ina ua mae‘a ona tali le faaaloalo a le itumalo.Afioga Lautafi Fio Purcell, i le aso na faatautoina ai e avea ma Minisita fou o le Kapeneta