Ua silia nei i le sefulu tausaga talu ona faatu le faalapotopotoga tumaoti o le To’omaga mo ē Puapuagatia ma o le aofaiga lea o tausaga o sulufai i ai le atunuu io latou mafatiaga eseese. E lei solomuli le faalapotopotoga aemaise o le Peresetene i le tali atu ma maua ai le fesoasoani.
O le galuega foi a lenei faalapotopotoga ua aliali mai ai i fafo mata o sauaga eseese o loo aafia ai fanau, o le ituvai o tina ma tamaitai aemaise o mafatiaga o le atunuu lautele. O le fesoasoani foi a le Toomaga e lē o faapito i se ituaiga o tagata, poo se ekalesia poo totonu foi o Matagaluega a le Malo.
O le tofa Vaifale Soe o se tina o le afioaga o Leauvaa ua leva tausaga o avea ma sui o le Toomaga. O lona afioaga foi ua oo i ai se tasi o polokalame fesoasoani a le faalapotopotoga o le atinae o le i‘a o le Tilapia. E oo foi i fesoasoani o lavalava, nofoa faataavalevale ma tootoo mo nisi ua faaletonu o latou aao (vae) e lei faapea na misi i le faasoa a le Toomaga.
I se talanoaga ma le fetalaiga Vaifale Soe o le tofi Pulenuu tamaitai foi lea o Leauvaa, o le mafuaaga tonu lea o le matupalapala ua ave e lona aiga ma lona nuu i le Peresetene o le Toomaga, le Muliagatele.
“O le ā ea se mea e tauia ai le agalelei o le Peresetene ma le faalapotopotoga?” “Ua inu lo matou nuu i le agalelei o le Peresetene ma le Toomaga”, o le finagalo lea o Vaifale Soe.
I se talatalanoaga faasamasamanoa ma le Peresetene o le Toomaga na ia faaalia ai lona faagaeetia i le faaaloalo. “O ai ea a‘u ua manatu mai ai, aemaise le faigofie ona to se matupalapala o ni suafa maualuluga o ni nuu ma ni aiga i se isi tagata e leai se piitaga, ae ua ou talia le faaaloalo e ui sa faigata lava ia te au le taimi na oo mai ai le sāvali o le a fai lo‘u matai i le Muliagatele”. O le Aso Toonai na tea nei na faatino ai le faaaloalo a Vaifale ma lona aiga lea sa usu faaaloalo ai le nuu i le paia o tulafale o Vaifale ma Tevaga aemaise le mamalu o paia faalagilagi o Tuala ma Sala i ona mamalu faalupe.
E na o le tasi lava le nofo ua na o le afioga i le Peresetene o le Toomaga mo ē Puapuagatia. Na maau foi le nofo fou i faaaloaloga masani aemaise e sefuluafe le seleni na faatino ai le faamoemoe.
Na masii mai Salafai i nisi o sui o le Toomaga ona o le fia molimauina o le faamoemoe, ma e faapena foi i sui o le ofisa autu o le Toomaga i Apia. O le Pelesetene na faatoa nofo matai i se tasi o suafa matai o lona aiga i Malaemalu i Falealili i le tausaga ua mavae, lea na suafa ai i le igoa tulafale o Siliniu.
Peitai o lea ua faaee i ai ma le suafa tamalii o le Muliagatele ona o le matupalapala ua faaaloalo i ai Vaifale ma Tevaga.
