Faaaloalo Samoa i le Failautusi Aoao Malo Aufaatasi – Faaee le Suafa Tupua ia Ban Ki Moon

Ua ese lea taeao o le Aso Sa ua lē ofu papae ai le mamalu o Si‘upapa ma Saleapaga i Aleipata ae ua sulu le siapo a taulelea ma matai fai puletasi felanulanuai o le Sa‘oao ma Tamaitai ma ua agai i le tasi o maota o le afioaga.

O iina ua potopoto ai le nuu ona o se sauniga faapitoa ua faatautaia ai. O le faafotutupu o le alii aupito i maualuga le tulaga i le lalolagi, le Failautusi Aoao o le Faalapotopotoga o Malo Aufaatasi, lea ua malaga asiasi mai i lenei pito o le atu Aleipata i le taeao o le Aso Sa. Sa iai lava foi le gugulu ona o le fai o nei faatasiga faapea o se faafotutupu i le Aso Sa peitai na mulimuli logo ane le afioaga, e mafua ona o le matuā leai se taimi e mafai ona faatino ai lea sauniga ma e puupuu foi aso o le vaiaso o le a iai lenei alii i totonu o Samoa.

O fu‘a o le malo o Samoa ma le malo o Korea i Saute, le atunuu o Ban Ki Moon ua faapea ona sisi faaitualalua i tulimanu i luma o le maota lenei i Saleapaga. O le aumaga ua laulaututu i itu e lua o le auala tele.
O nuu nei sa i tai uma lava i le matafaga ma o iina sa iai aai ma le nuu atoa ae talu mai le tsunami o le 2009, o lea ua agai uma ma faamautu i gauta ona o puipuiga lava i nisi faalavelave faalenatura e ono toe aliae mai i le lumanai.

Ua pisapisao le nuu i le taeao, o ato niu ma le faausi ua sauni e tali ai le faigamalaga, le faamāmā avega e pei ona unai i lenei vaitaimi. O loo iai ma le sua lava e tasi ua saunia mo le alii taitai lenei o Malo Aufaatasi.

Sa muamua taunuu mai le Alii Palemia, ma lona faletua ma ua faatali atu le afioga i le Fofoga o le Palemene ma le sui Peresetene o Faamasinoga o Fanua ma Suafa ua leva ona usu atu i le taeao.
Sa feiloai ma amata loa ona faamalamalama e le alii Palemia i le saofaiga a matai o le afioaga le tagata lea o le a faaee i ai le suafa tāua o le nuu, i ona tofiga ma lana foi galuega o le faafilemu o le tele o taua ma fevaevaeaiga o le lalolagi, ae o lea ua faavanoa lava lona taimi e sau ai i Samoa ona o le fia tatala aloaia o le fono tele lona tolu a Malo laiti tauatiae a le lalolagi lea ua usuia i Samoa.

O le faaeaea ua ave e Malo Aufaatasi ia Samoa e talimalo ai i le faitau afe ua i Samoa nei, na mafua ai le manatu o le taitai o le malo ia ave foi le faaaloalo maualuga e mafai e Samoa e amanaia ai foi lenei taitai ma lana lagolago mo Samoa.

O le suafa ua faalagilagi o le Aloalii i le afioaga o Saleapaga ma Si‘upapa le suafa Tupua lea na autasi le afioaga e faaee i le faauluuluga o Malo Aufaatasi ma na faafetai lenei taitai i lona fesootaiga ua iai nei ma tagata o lenei itu o le atu Aleipata. E le gata i lea o le faaeaea ua avatu e Samoa e ala i lea suafa o Tupua.

Sa faamanino i ai e le alii Palemia le tautua e moomia ona fai e le matai le afioaga ua avatu lana faaaloalo ma lona suafa tāua. Ma o le meaalofa muamua lava na tauaao atu e lenei taitai i le saofaiga a le afioaga o Saleapaga ma Si‘upapa e $10,000 (tala Samoa).

O le tautinoga a Tupua Ban Ki Moon o le a ia fesootai pea ma lona nuu i le lumanai ma tauave le suafa ua faaee atu ia te ia ma le mitamitaga o lona loto. Na ia faafetai foi i le alii Palemia i le faaaloalo maualuga.
Afioga i le Aloalii, Tupua Ban Ki Moon

Taimi o le ava faatupu

Taunuu Ban Ki Moon i Saleapaga mo le faafotutupu