O se faaaloalo maualuga o se Alii Sili, o le atunuu o Papua Niu Kini aemaise o se faailoga taualoa ua tuuina atu e lea Malo mo se taimi muamua i se taitai o le Pasefika, ua faaee i le afioga i le Palemia o Samoa, Susuga Tuilaepa Lupesoliai Sailele Malielegaoi. O le faaaloalo lenei ua ta‘ua o le Grand Companion of the Order of Logohu (GCL) lea ua faaopoopo i ai ma le faalagiga o se Matai Sili poo le Chief. E tusa ai ma le faatulagaga o faailoga taualoa i faaaloalo maualuluga a lea atunuu, o se tasi lea o faailoga taualoa pito maualuga ma tāua ua faaee i le Palemia o Samoa.
O le alii sui Kovana sili o Papua Niu Kini o Theodore Zurenuoc na faaeeina le faailoga i se sauniga sa faia i le maota o le Kovana sili o lea atunuu. I se lipoti tusitusia i le faaaloalo a Papua Niu Kini na ta‘ua ai ua auala mai lenei faaaloalo maualuga ona o le sao o le Palemia o Samoa i galuega mo le manuia o lea atunuu aemaise o sootaga vavalalata ma le mafanafana o Malo e lua.
Na saunoa Tuilaepa ma ia momoli le faafetai i le alii Palemia o lea Malo o Peter O’Neil ona o le afea o Samoa i se faaaloalo sili ona tāua ma maualuga a lona atunuu.
Na faailoa ai e le Palemia o Samoa le tele o atinae o loo galulue ai Malo aemaise o tausaga e tele ua mavae sa galulue ai misionare mai Samoa i Papua Niu Kini e pei o tuaa o le afioga Tofilau Eti Alesana, o lē sa avea foi ma Palemia o le tatou atunuu.
O nisi o auga misionare sa tautua i le feau o le Talalelei i Papua Niu Kini o nisi o le aiga o le alii Palemia le Susuga Tuilaepa Lupesoliai Sailele Malielegaoi. O se tasi o mafuaaga o lenei faaaloalo ona o Tuilaepa o se tasi o taitai sili ona sinia ma umi lana nofoaiga faapalemia i atunuu o le Pasefika. Mo le silafia e le aufaitau o se tasi o lagolago tele a le Malo o Samoa ua tuuina atu i se aufaipisinisi mai Papua Niu Kini o loo latou atinaeina nei se faletalimalo faaonaponei ona fausaga o fale ma isi vaega uma, lea ua lata ina mae‘a e pei ona faatuina i Taumeasina, se tasi o nofoaga o le afioaga o Moataa i le itumalo o le Vaimauga.
O se pisinisi muamua lea ua ofo e fausia lea atinae tau tagata tafafao ma ua taunuu, pe a faatusa i nisi o pisinisi ma kamupani mai fafo na latou uluai folafola le fausia o se atinae faapea i Taumeasina ae e lei taunuu. O le Palemia o Niue ma le Peresetene o le Malo o Kilipati na tauaao foi i ai ni faailoga taualoa e lea Malo ona o le sao foi o ia taitai o le Pasefika i le atinae o atunuu laiti. O taitai o Malo nei o Kilipati ma Niue o loo tutu malosi ma taitai uma o Malo laiti e lē aofia ai Niu Sila ma Ausetalia, i le finauina o ni aiaiga talafeagai mo le puipuia o atunuu laiti mai suiga o le tau.
