E to’a 428 alii ma tamaitai ua faamanuaiina ma faauu i faailoga tipiloma, tikeri ma le Master i tomai eseese mai lava i a’oa’oga, tomai o suesuega faasaienisi, foma’i, tausi soifua, ma le faatosaga.
Oi latou ia ua mae’a a’oa’oga ile Iunivesite Aoao o Samoa. Ole faauuga ole tausaga nei na faia ile Aso Faraile ua mavae 6 o Aperila 2018, na amata ai le sauniga ile faaeeina ole faailoga Foma’i faapitoa ile afioga ile Sui ole Fono o Sui Tofia le afioga Le Mamea Ropati Mualia.
O ia ose sui faavae ole Iunivesite i lona tulaga ole Minisita o A’oga ile faigamalo a Tofilau Eti Alesana ile tausaga e 1984 na amatamea ile tapenaina ole faatuina ole Iunivesite Aoao a Samoa lea na amata mai i Malifa. E to’a fasefulu tama ma teine na amataina le Iunivesite ale atunuu ae ole taimi nei ua oo le aofaiga o fanau ua aooga ile Iunivesite ile tolu afe.
Na saunoa ma malele le afioga Le Mamea Ropati ma ia toe afea ai taimi faigata ole amata mai ole Iunivesite ona sa ulagia ai o ia ole Minisita o A’oga poo fea ole a aumai ai ni tupe e faatino ai le fuafuaga ale Malo i lea taimi.
O tusitusiga a nusipepa na matuā malolosi ai faitioga ile faatuina ole Iunivesite peitai na saunoa Le Mamea e tasi lava le autu na mafua ai le faaiuga ale Malo ole vaai alofa i alo ma fanau ole atunuu. Ua 34 nei tausaga ole Iunivesite Aoao o Samoa ma ua siitia pea lona tulaga i tomai ua a’oa’oina ai.
Ile 428 ole au faauu o lenei tausaga 2018 ose vaega toatele oi latou o loo galulue i tomai faapitoa o loo tautua ai ae sa toe ulufale ile Iunivesite mo le saga faalauteleina o o latou tomai ma ausia ai se isi tulaga sili atu i faailoga ma tusipasi.
Ole tomai faafaiaoga ma le tausi soifua e pito toatele iai le numera oi latou ua maua faailoga tikeri ma tipiloma maualuga. E to’a 107 alii ma tamaitai faia’oga o A’oga tulagalua ua maua tikeri ae 48 alii ma tamaitai faia’oga o A’oga maualuluga ua maua foi faailoga tikeri.
Ose tasi o itu mataina ole faauuga o lenei tausaga o nisi o tina ole atunuu ua ausia nisi o faailoga maualuluga ile itu i a’oa’oga. Ole faletua o Peru Papalii Tugaga ua ia maua le faailoga tikeri ole matuaofaiva i mataupu tau a’oa’oga le Master in Education.
