Ua faalauiloa aloaia mai nei le fesuiai o vae o le taamilosaga o fusuaga faapolofesa a le Pasefika, le Pacific Rim Boxing Championship, lea sa fuafua e amata i Niu Sila i le masina o Aperila.
Peitai ua suia lea fuafuaga ma o le a talimalo ai nei Samoa i le vae muamua o le PRBC i le fusuaga tele faavaomalo i le po o le Aso Tofi, 31 Me i le faletaalo o le Malo i Tuanaimato.
Faaalia e le Taitaifono o le PRBC, Pa‘u Fereti Puni, “O Samoa sa tuu e talimalo ia Tesema i le vae lona fa, peitai ua toe silasila le Komiti Faafoe i le tele o le sao o Samoa i fusuaga faavaomalo ma ua talafeagai ai le tuuina atu o le faaaloalo ia Samoa e talimalo ai i le uluai vae o le taamilosaga o fusuaga faapolofesa a le Pasefika ua faavaeina nei, e tamua ai le faamanatuina o le 50 tausaga o le tutoatasi o Samoa.”
I paga e ono faapolofesa faavaomalo o le a fetaui ai Gogosina Ulutoa o Samoa ma Temoo Temaititahio o Tahiti i le aupaga mamafa. I le aupaga cruiserweight o le a fetaui ai Saipeti Muga Asiata o Samoa ma Alapati Aasa o Amerika Samoa, ae o Francis Mamoe o Samoa o le a taaalo ma Farani Tavui lea sa avea ma sui o Samoa i fusuaga a le Olimipeka.
O Iosia Nanai o Samoa o le a fusu ma Savenaca Navila o Fiti i le aupaga super middleweight. I le aupaga welterweight o le a fetaui ai Tony Iapesa o Samoa ma Tinitua Neagle o Tahiti, ae o Michael Fonoti o Samoa o le a fetaui ma Johnny Singh o Fiti.
Faaalia e Tuilagi Saipele Esera o loo faauluulu i ai tapenaga a Samoa, “O le fa tausaga ua tuanai sa faavaeina ai le taamilosaga o le Samoa Pro Am Fights e taumafai ai e toe lalaga fusuaga faapolofesa ma fili tama fusu mai aupaga taitasi.
Peitai o le avea ai nei o le vae o le PRBC i Samoa ma fusuaga o le Sisigafua i tausaga taitasi, o se tulaga maualuga lea ma le mataina o le a iai le fusuaga o le faamanatuina o le 50 tausaga o le tutoatasi o loma nei ona o le a fua ai le lelei o a tatou tama i le taaalo ai ma tama fusu Tahiti, Fiti ma Amerika Samoa.”
O le taimi muamua lenei o le a fetaui ai se aufusu faapolofesa a Samoa ma ni tama fusu masii mai i ni atunuu se tolu e pei ona iai Fiti, Tahiti ma Amerika Samoa i se po se tasi.
O le ipu a le Palemia o Samoa e ono paga ‘amateur’ lea o le a taaalo ai tama fusu mai Tutuila ma Manu‘a faapea tama fusu mai Upolu ma Savaii.
O le ofi atu o Samoa i fusuaga faavaomalo a le Pasefika, le PRBC ma avea ai ma fusuaga o le Sisigafua i tausaga taitasi, o se tasi lea o molimau ola o le galuega fauao faupo a le kamupani faifusuaga a Samoa, le Event Polynesia, e toe faaolaola fusuaga faapolofesa ma siitia le tulaga o tama fusu a Samoa ma le Pasefika i taaloga faavaomalo.
O Samoa, Niu Sila, Fiti ma Tahiti o sui faavae ia o le Pacific Rim Boxing Championship lea ua ofi mai i ai ma Amerika Samoa, o se sui auai e auala mai ia Samoa.
O isi atunuu ua faailoa mai le fia auai i le taamilosaga lenei o fusuaga faapolofesa a le Pasefika e aofia ai Tonga, le Atukuki, New Caledonia ma Vanuatu. O sui auai (affiliate members) e le mafai ona talimalo i se vae o fusuaga a le PRBC vagana ua avea ma sui aloaia (full member).
O le tolu ai lenei o tausaga talu ona aloaia fusuaga i le polokalame o le Faamanatuina o le Tutoatasi o Samoa. Manatu o le avanoa muamua lenei mo le toatele o e malaga atu i fafo e mafai ai ona maimoa i le atina‘eina o fusuaga i Samoa.
Mo faamatalaga i pepa ulufale ma nofoa faapitoa (corporate tables) faafesootai Tuilagi Saipele Esera i le imeli saipele@eventpolynesia.com
