O le isi lea vaega tāua o le faagasologa o polokalame faaauau i totonu o le aoga maualuga a De La Salle College i Magele, o le faalauiloaina o mataupu aoaoina i totonu o le aoga ina ia nofo silafia foi mātua ma aiga i taumafaiga ma tomai a alo ma fanau o loo tuuina atu i aoaoga.
Maeu foi le tomai ma le agavaa ua faatinoina e fanau e ala i tusigaata, lea sa faia ai le faaaliga mo mātua ma aiga na agai atu e maimoaina ma molimauina galuega a fanau i le afiafi o le Aso Tofi.
Sa maitauina le toatele o alo o Samoa o loo latou tauaveina lea mataupu i totonu o le aoga ma o se mitamitaga sili foi lea na faaalia e susuga i faiaoga o loo latou aoaoina lea mataupu.
Sa faaalia foi le lagona faagaeetia o nisi o mātua na auai atu e molimauina lea faamoemoe ma latou saunoa ai e faafetai galuega mae‘ae‘a a susuga i faiaoga ma le fesoasoani tele e faalautele ma faatāua le taleni tusi ata a fanau.
