A lelei ona faafailelei taleni ma manaoga o le fanau mai le taimi faato’ā vaaia ai pe faailoaina, e talitonu le faamoemoe e mafai ona avea lea ma tapasa ma taiala o le ola sogasoga o le tamaitiiti mo le atina’eina ma le faaauauina ina ia taunuu manuia mo lona lumanai. O le vaiaso mulimuli lava o le kuata ua mālōlō nei na faia ai se faaaliga taleni i totonu o le aoga tulagalua a Te Matauranga i Manurewa.
O fanau mai vasega eseese e iai le vasega faauu o le tausaga 8 a le Iunite Samoa ma le aoga atoa sa auai i le faaalia o a latou taleni mai pese taitoatasi, o pese taitoalua, o siva a vaega faaneionapo ma le faaaogāina o instruments (mea fai-musika).
Na mataina le maimoaga a mātua auā na faatumulia le hall a le aoga i le taupati atu a nai mātua e fia molimauina le faamoemoe sa feagai ma nai fanau. Ia manatua lelei, e eseese uma lava tamaiti ma o latou manaoga ma a latou taleni.
A o le lagolago ma le faalototele a mātua, faiaoga ma tagata lautele, o le a mafai ai lea ona faailoa mai ma faaauaua ai a latou taleni ma manaoga ina ia avea ai le fanau ma ni taitai lelei ma faamoemoeina o le lumanai.
Na vaaia le fiafia o le fanau i le faatinoga o a latou taleni taitoatasi ma vaega foi, auā na mae’a le faaaliga taleni, ona faatofutofusia foi lea o i latou uma ma ni faailoga e faafiafiaina ai lo latou taumafai.
