Ua savalia nei i le 5 tausaga o faagasolo pea ma faailoa meaalofa ma taleni a le Atua ua foai ma tuuina i fanau. O lenei polokalame ua mafai ona tuufaatasia e matagaluega e 25 o le ekalesia Katoliko i Aukilani.
O le Aso Toonai ua mavae, 19 o Iulai, na tumutumu ai le maota o le ekalesia i Malaeola i aulotu taitasi e lagolago ma apogi le faamoemoe e pei ona faataunuuina i tausaga taitasi. E 19 aulotu ma a latou Aoga Aso Sa na auai, a o nisi ekalesia sa lē mafai ona faatasi atu i le faamoemoe ona e leai ni a latou Aoga Aso Sa.
O tuaa sinasina seia oo lava i fanauiti na vaaia lo latou fiafia i lenei polokalame auā o le autu lea o le faaaliga taleni, o le faamalosia ai o mātua matutua i totonu o ekalesia. Na amata le polokalame i le sauniga lotu na taitaia e le susuga i le tiakono ia Sanele Sanele mai le Katoliko i Manurewa.
Na auai uma Afioga i Patele mai matagaluega eseese i Aukilani faapea foi susuga i tiakono ma o latou faletua, faatasi ai ma le peresetene aoao le afioga ia Afua Mua Seve.
O taleni na faatinoina, o pese ma siva faaleagaga faapea faafiafiaga faa-Samoa, e lavea ai mauluulu ma pese Samoa. E suifefiloi lava le ula na molimauina e le toatele o le atunuu i lea aso, e ala i taga ma molimau na faatinoina.
Na tuu lava i le faitalia a le ekalesia i le latou aitema e mafai ona faailoa i lenei polokalame.
O le Fofoga o le Aso Sa o le susuga ia Tanu Tanupo mai le aulotu a Magele Sasae. O molimau ma siva faitaga na faafofoga ma silasila i ai mātua i fanau, o feau tau molimoli ia i totonu o aiga faapea le galuega a le Atua.
O le tāua foi o lenei faamoemoe, e tulimatai ai e auauna a le Atua ma mātua o latou alo, o le lumanai manuia lea o aiga ma ekalesia.
E faagasolo lava le polokalame a o galulue foi le augasese e tufa le sanuisi ma le ipu kofe auā le faamalositino mo le paia i ekalesia na auai.
Ua iai foi le faamoemoe o matagaluega taitasi a le Ekalesia Katoliko i Aukilani i le tausaga fou o le a toe faataunuuina ai lenei polokalame tāua.
