E lē o toe po Malae i le silafia le auaunaga su‘isu‘i a le faletua ia Susana Ah Wong e pei ona tautua ai i lona faleoloa i Saleufi, ae ua lua nei vaiaso talu ona faaopea lana asiasiga i le aai o Melepone, mo le faalauiloaina o ana Laei ma le taleni e ala i faaaliga laei (fashion show).
O le afiafi la o le Aso Faraile na tuanai atu, na galulue faatasi ai ma lana paaga i Melepone le faleoloa o le B&T Island Style o loo pulea e le faletua ia Tofiga Tuigamala, ma faataunuu ai le Show i le pitonuu o Hampton Park.
E toatele le paia lasilasi o le atunuu na taupati atu e maimoa ma silasila i mamanu ma su‘iga eseese o laei, mai puletasi a tamaitai i laei tafao o alii ma tamaitai, laei faa-Polenisia aemaise o laei faa-Samoa o alii i iefaitaga ma ofutino aloha, laei mo sauniga faapitoa ma aso tetele faapea ma laei mo sauniga lotu, ae taualuga i laei faaipoipo mo alii ma tamaitai ma a la uosili ma aumeamamae.
E sa‘afi Samoa i ana measina, ae o Laei Samoa e faamatalaina a ta tu ma agaifanua, se ua malie mata i vaai!
O le fofoga o le po o le susuga ia Faalavelave Falani Frost na tausoa le la galuega ma le tamalii lauiloa o Cindy of Samoa na malaga faapitoa mai Niu Sila e faatautaia le Fashion Show.
Atonu o se uluai taimi foi lea ua silasila ai le mamalu i Melepone i taleni ma agamalie a Cindy, na o latou galulue faatasi ma le faili malosi a le Pioneer Band i siva faapapalagi ma sausaunoaga faa-Samoa na vasa‘i ai le afiafi.
Na maua foi le laolao na faafofoga ai le valaaulia i le siufofoga mālie o se tasi o tamalii pese lauiloa le tofa Tolumaanave Misiluki Su‘a. Na toe a tofu le paia lasilasi o le valaaulia ma laei aemaise o ie solosolo na tufa faameaalofa i lea afiafi.
Na tauaao foi e Susana ma Tofiga faailoga mo le mamalu na laeiina laei a le Susana Collection, ma tatala foi avanoa na mafai ona faatau Laei na faaali i lea po. Soosoo tauau pea afioga i Faletua nei e tautua Samoa i le aai, o Laei uma na faaalia i le faamoemoe, o loo faatauina i le faleoloa o le B&T Island Style. Manuia a lua sailigamalo Susana ma Tofiga!
