Ua oo ane au tatalo e fai ma faamanatuga i luma o le Atua. O le auaunaga e fai ma le loto fiafia ma le alofa o le taulaga sili lea i le Atua. O upu ia na faamalosi ai le susuga i le faafeagaiga ia Rev Samuelu Vaeani i le aso fiafia o le susuga i le faafeagaiga ia Tuimaseve Gasu Misikupa i le Aso Toonai ua mavae i le hall a le Otahuhu Intermediate School i Otahuhu.
Na molimauina e le toatele o le auvalaaulia ia upu auā e aogā i tagata uma. O le faaalia o le loto fiafia ma le lagolago o tagata na faatumulia ai lea hall i le paia o le aufaigaluega totofi a le Atua ma o latou faletua, paia o Ekalesia o le First Samoa Revival Church, faapea aiga na lua, o uo ma ē masani.
O le failautusi o lea matagaluega le susuga ia Ausage Mumu Vaveli o loo faifeau i Avondale ma lona faletua sa auai, Rev Samuelu Vaeani o le peresetene o le Ekalesia Metotisi Uesiliana, Pastor Taito o le AOG i Manukau, faapea le malaga mamao mai o le toeaina le susuga i le faafeagaiga mai Melepone ia Faiumu Faletuai ma nisi o faafeagaiga ua lē māua o latou suafa.
O le tāua o lenei faatasiga e lē gata ina faamanatuina ai le aso soifua o le susuga i le faafeagaiga ae ua maua ai ma le avanoa e toe mafuta ma feiloai ai tagata o aiga, uo aemaise lava i le aufaigaluega a le Atua, auā e seasea maua nei feiloaiga.
O le faamoemoe ua taunuu o le laau lea o le ola, ae alaga le faisalamo o Tavita, ‘Lou Agaga e, ia ou faamanu atu ia Ieova o mea uma foi o i totonu ia te au ia faamanu atu i lona Suafa Paia.’ O le pepese fiafia foi lea sa iai le auvalaaulia ma i latou uma sa auai i le aso fanau ina ua amata le polokalame i le sauniga lotu, lea sa taitaia e le toeaina mai Melepone ia Faiumu Faletuai.
O le tatalo na fofogaina e le faafeagaiga ia Taito, faitauina o le afioga a le Atua na saunia e le faafeagaiga ia Ausage Mumu, folafolaina o le upu a le Atua na mānavaina lea e le Peresetene ia Rev Samuelu Vaeani. O se sauniga mamalu ma le matagofie i le fesoasoani o le Agaga o le Alii.
Na sosoo ai ma le faapaiaina ma le feulaina o le keke, ma faasolo ai loa ma le amataina o faafiafiaga. O le fofoga o le aso o le susuga ia Malofou Gasu. Na tatala aloaia faafiafiaga i le siva a le toeaina ia Tuimaseve, ma sosoo ai ma le autalavou mai Avonadale, ae taualuga e le autalavou i Otahuhu ma le Ekalesia o le First Samoa Revival Church e molimoli ai o latou alofaaga ma faamanuiaga i lo latou tamā faaleagaga.
O le mālie ma le tu‘itu‘i o musika a le DJ na lē malolo le isi loomatua ma le isi toeaina i le siva faasolo atoa, na oo lava i susuga i faafeagaiga sa matuā faaali lo latou fiafia i le kepu faalausosoo. Na tasi lava le tulimanu na tulimatai e le auvalaaulia o le itu o le taumafataga, lea sa fusu mai ai le faletua ia Alofa ma le faleaiga o le Paradise.
E lei toe iai se gase ina ua salani e le paumu ma kuka eseese le aso atoa, ma sa matuā faamalieina le galala ina ua vaivai mai i musika tu‘itu‘i. O le molimau a le faletua ia Pisila i le la mafutaga ma si ana pele, o se tamā e osi aiga, nuu faapea le Ekalesia, e lē mafai ona tuua e Tuimaseve se mea e valaau mai ai aiga i Samoa auā o le tamā sa tautua i le aiga ma le nuu.
Ae lologo le auvalaaulia ina ua tulai le susuga i le faafeagaiga ia Tuimaseve ma faapea ana upu, o ia o se tama laitiiti, o loo ia faatinoina ni galuega i le fufuluina o ipu ma tapena le fale. O ia foi o loo tumau pea lona laitiiti auā e lei sinasina lona ao, sa faaleoina foi ma lona loto faafetai i ona uso a faifeau sa mafuta atu faapea o laua aiga ma le tina aemaise o Samoa potopoto sa auai.
Na mālie i le faafofoga lea molimau auā o uiga lava ia o le tamā e mālie ana saunoga. O upu taumavae o le aso na tutootoo ai le susuga ia Toleafoa Nati e fai ma sui o aiga na lua e molimoli se faafetai i ao faalupega ma o latou faletua aemaise o Samoa potopoto sa auai, faatasi ai ma ni meaalofa seleni e talimasineia ai le aso faapitoa o le susuga i le faafeagaiga.
O le faafeagaiga ia Tuimaseve ua loa ona galue faafaiaoga i Samoa, sa puleaoga i nisi o aoga a Itumalo, faiaoga i le gagana Samoa i le Kolisi o Uesiliana, pule i nisi o vaega i le fale ava malosi o le Vailima, toe taliu faiaoga ma agai mai loa i Niu Sila.
Sa toe faaauauina le galuega i le aoaoina o tamaiti i nisi o Kolisi i iinei, faatinoina le polokalame o le gagana Samoa i luga o le leitio a Faiumu Faletuai, ma oo lava ina fai le filifiliga e fia galue i le Atua ma lona finagalo.
Ua galue nei faafaifeau i le Ekalesia First Samoa Revival Church i Otahuhu, o ia foi o le toeaina o le pulega faatasi ai ma lona tofiga sui taitaifono o le Ekalesia Aoao. Ua savali nei i le 15 tausaga o galue i totonu o lenei galuega ma le faletua ia Pisila Tuimaseve.
