Faaali le valevale alofa ona o pelega o auauna paia a le Atua

O se aso taeao segisegi na faasavali ai ma vaaia pasi masani a le Mafutaga a Tina o le Pulega a le EFKS Saute i luga o le alatele, ona o le Faamati e pei ona masani ai. O le Aso Toonai, aso 1 o Mati, na alo atu ai le pulega a Saute, o se Pulega pito toatele lea o isi pulega a le Matagaluega EFKS i le latou Faamati.  E pei ona silafia o le galuega faasolo lea o loo nafa ma le afioga i le Tiakono Toeaina, le susuga ia Ofoia ma le faletua ia Apaula Lemamea, o le asiasia lea o maota o le aufaigaluega poo ā ni vaega o fia faaleleia.
Na ta‘ua mai le matagofie ma le uigaese felanulanuai  na oo i ai ma molimauina ai le Aso Toonai, ua lē gata o totonu o malumalu o le Atua ae faapea foi maota o le galuega. O matatia ma tomai faapea taleni i tulaga tau mamanu sa faatinoina e nisi aulotu ma mafutaga a Tina. O le vaiaso lenei sa amataina e le Pulega a Saute le Faamati, o le vaiaso nei o le pulega a Sisifo ae faauma i le Aso Toonai aso 15 e le Pulega a Matu. O le susuga ia Elder Tauaaga ma le faletua ia Senerita Mataafa o le toeaina taitai lea o le Pulega a Saute, Failautusi Rev Petaia & Sarai Tuifao ae o le teutupe o Rev Peniamina & Lesa Tuifaasisina, o le Peresetene a le Mafutaga a     Tina o le faletua ia Alapeta Faaiuaso. Sa felanulanuai ma sasala taumafa sa tapenaina, ma faaiuina ai ma le manuia ina ua goto le fetu o le afiafi.