O se vaaiga i le aso na faaali ai le ata Vaega 2 o le Toe foi le Tama Savaii i le Mangere Art Centre. O le molimau e matautia le toatele o nai mātua matutua sa auai. O nisi tina ma tamā matutua, e mananao e uma le ata ona toe nofonofo ai lava lea i le nofoaga na faaali ai, ma iu ai ina toe totogi isi tickets ae toe alu le faalua e matamata.
Na fesiligia se tasi tina matua e 86 tausaga ma o lana molimau, ua lē mafai le fia oo mai e matamata ma avea o se aso e tafao ai. Na maitauina pe lima ni wheelchair ae lē taulia le isi vaega na savavali mai i tootoo crutches ua lē mafai le fia vaai i le ata.
Na matuā faateia i le toatele o ē na auai mai i faaliga e tolu. O le manaoga ua faaoo mai pe mafai ona fai pea se aso tifaga i masina taitasi mo nai tina ma tamā matutua us fiu foi i nonofo i le fale.
O lea ua taatia atu lea manaoga i le pulega ma na ta‘ua e le susuga i le alii pule, o le a faailoa atu lava i luga o le Radio Samoa poo le Samoa Times se fuafuaga faapena pe a oo ina faamautuina, ae e matuā fiafia le Vision Pictures e faia pea lea polokalame mo ē matutua.
O le vaiaso talu ai na tatala ai le ata i Samoa ae o le aso 28 e tatala ai i Sydney Ausetalia. Sa momoli le faafetai tele a le alii pule ma le aufaigaluega, i le mamalu o le Atunuu na auai atu i lea aso mo le maimoaina o le ata tifaga. Faamanuia atu le Atua.
