E fā (4) loli fuimu o le a faatupeina e le Malo o Iapani lona auina mai i totonu o le atunuu. E silia ma le $77,171 tala Amerika le tupe o le a faatupeina ai lea faamoemoe.
Na faatautaia le sainigalima a le afioga i le Amapasa o le Malo o Iapani, Afioga Tuimaugaoalii Kazumasa Shibuta ma le afioga i le Komesina o Fuimu, Afioga Lelevaga Faafouina Mupo, i le Aso Lulu 28 Ianuari 2015, i le ofisa o le Amapasa o le Malo o Iapani i Apia.
O le faatupeina ai e le Malo o Iapani o loli fuimu e fā, o loo faatupeina i lalo o le Polokalame Fesoasoani a le Malo o Iapani mo Atinae. O ia loli fuimu o le a auina sa‘o mai lava i Iapani i Samoa nei, e fesoasoani i isi taavale fuimu a le Pulega o loo iai, e tali atu ai i faalavelave tau mu i totonu o le atunuu.
Na saunoa le afioga i le Amapasa o le Malo o Iapani e faapea, o le fesoasoani ai o le Malo o Iapani i le auina mai o ia loli fuimu, o se tasi lea o auaunaga tāua i totonu o Samoa, i soo se taimi e tutupu ai faalavelave faafuasei.
“O le auaunaga a le vaega o fuimu e lē na o le faaumatia o afi, ae fesoasoani foi i taimi e tutupu ai faalavelave faalenatura.”
O le auina mai ai o loli fuimu, e lē gata mo le faaleleia atili o le auaunaga a le Ofisa o Fuimu, ae o le a aogā tele mo le mamalu o le atunuu, ina ia tutupu mai faalavelave tau i mu, ae o loo lava taavale fuimu e tali atu mo ia faalavelave, o le faaopoopo lea a le afioga i le Amapasa.
Na momoli le agaga faafetai o le afioga i le Komesina o le Ofisa o Fuimu, ona o le fesoasoani a le Malo o Iapani e pei ona iai le faamoemoe o lea aso. “Faafetai i lo outou manatu mai i le Ofisa o Fuimu ma le latou galuega faatino, aemaise o le auaunaga o loo faatino mo Samoa,” na saunoa i ai Lelevaga Faafouina Mupo, Komesina o le Ofisa o Fuimu.
O le faafetai a le Afioga i le Komesina mo le Malo o Iapani, na tauala atu lea i le afioga i le Amapasa, ona o le fesoasoani tāua, e lē gata mo le Ofisa o Fuimu, ae faapea foi i le Malo o Samoa ma le atunuu atoa.
E lei mafai ona faamaoti mai poo afea lea ua fuafua e taunuu mai ai taavale fuimu e pei ona fuafuaina, peitai o le agaga faafetai o le afioga i le Komesina, ona o lea ua faataunuu le sainigalima e faatupe ai le auina mai o ia taavale fuimu e fā i totonu o le atunuu.
O lea o le a faaopoopo taavale a le Ofisa o Fuimu, ma e iai foi le talitonuga o le a siitia atili ai foi le auaunaga a le Ofisa e ofoina atu mo le mamalu lautele o le atunuu, pe a valaau mai i le taimi o faalavelave tau mu i o latou maota ma laoa ina ia tineia, o le faaopoopo lea a le afioga i le Komesina.
“Tatou te faafetaia ai pea le Malo o Iapani, ona o le latou faatāuaina o le galuega o loo feagai ma le Ofisa o Fuimu i totonu o le atunuu.”
Talu mai le tausaga e 1991, lea na amata mai ai le galulue faapaaga o le Malo o Samoa ma le Malo o Iapani, o loo iai le faamoemoe e faaauau ai pea lea galulue faapaaga auā le manuia o tagata lautele.
