E lē o tagata uma e faipisinisi, e lē o tagata uma foi e ofisa, ae iai nisi ua valaauina e faaauauina le taleni ma le meaalofa poo le matupalapala na tuuina e le Atua i totonu o le aiga.
O le taeao o le Aso Toonai ua mavae, 13 o Fepuari na lolofi atu ai le au faatau taavale e molimauina poo ai o le a sola ma le faailoga tupe e $5,000.00 o le faailoga muamua o le Se‘i a le G-Mana, o i latou sa faatauina a latou taavale mai ia Ianuari seia oo mai ia Fepuari.
O le lolofi atu o tagata i lea aso na latou molimauina ai le felanulanuai o faafiafiaga na saunia e le au pepese aemaise ai o le ausiva o le La o Samoa.
O le faili a le G-Mana Band, o le susuga ia Iakopo Fa‘ipa‘ua faapea le aufaipese a alo a le afioga ia Galumalemana sa faafiafia.
O le toatele o i latou sa auai, na maofa i le maoae ma le maualuga ua oo i ai le taleni a nei alo e toatolu, le alii o Puirs, Emanuel ma le tamaitai ia Princess Maryanne i le usuina o pese fou faaonaponei aemaise ai o le taina o mea faili lea e fesuisui ai latou i le taina i soo se taimi.
O le tele o le faaaogāina o nei fanau talavou o totonu lava o le lotu i le Ekalesia Katoliko i Onehunga, ae o le taimi muamua lea ua mafai ona pepese ai ma faafiafia i ni nofoaga tumutumu faapenei.
O le manatu o nisi sa auai e lē mafai ona momotu le taleni i totonu o le aiga, auā o loo iloa uma e tagata le alii pese o Manuniniva John Galumalemana lea ua lauiloa foi lona siufofoga i le musika, faapea le afioga ia Toleafoa Joseph Galumalemana o loo silafia foi e le toatele i pese o loo ia fatuina ma tusia aemaise lava i tauvaga a aoga o le Polyfestival.
O le fesuisuiai o manogi o le lolo i lea aso na solosolo lelei ai le taliga o le sua a le afioga ia Patele Michael Enderman na taitaiina le polokalame i le tatalo faapea nisi o faafeagaiga mai Tonga sa auai, faatasi ai ma le mamalu o le auvalaaulia. O le alii faasalalau ia Titiula Tuigalamala na fai ma Fofoga o le aso.
E 32 i latou sa faatauina taavale ma sa tuuina uma o latou suafa i totonu o le Se‘i. O le sui o le Radio Samoa, le faletua ia Motiana Tele‘a sa tolaulauina suafa o i latou na faamanuiaina.
E 10 faailoga e ta‘i $500.00 lea sa faamanuiaina ai:
1 – Mikaio Lauvi
2 – Laupepa Manulua
3 – David Casey William
4 – Sitiveni Funaki
5 – Losa Sooaemalelagi
6 – Sione Foketi
7 – John Triston Faavae
8 – Hakai Junior
9 – Francis Tapusoa
10 – Ioane Patita Ah Mann
Ae o le faailoga muamua e $5,000 na manumalo ai le alii mai Tonga ia Lupe Maamoana. Na faafetaia ai foi e tagata le auaunaga a le G-Mana i lea aso, ona o nei meaalofa ua mafai ona faasafua mai e fesoasoani ai mo aiga.
