Kolisi o Magele Siamupini Polyfest 2017 aoga tuufaatasi teine ma tama

Kolisi o Magele Siamupini Polyfest 2017 aoga tuufaatasi teine ma tama

E faitau eseese lagona ma manatu o matua ma tagata sa latou maimoaina ma molimauina taumafaiga a alo ma fanau mai aoga eseese ile tauvaga ole Polyfest o lenei tausaga 2017, ina ua maea le laugatogi ile Aso Toonai ua toe sola le Kolisi o Magele ma le tulaga muamua ae pepese le Kolisi o St Pauls ma le manumalo o aoga a tama ae suipi le Kolisi o Kelston Girls ile siamupini o aoga a teine.

Ole eseese o ia lagona, o nisi o matua oloo faatatau lea ile le fiafia i faaiuga a faamasino sa gafa ma le togiina o polokalame o lenei tausaga, ao nisi o matua sa agai so latou lagona ma faamamafa le tele ole taimi o fanau oloo alu ile aoina o polokalame ao lea lava oloo maitauina i tausaga taitasi o aoga lava nei oloo ile tolu pito i luga o lea lava oloo vaaaia ile tele o tausaga oloo finauina le tulaga muamua e oo ile tulaga tolu.

Waitakere College

Waitakere College

Ae ole fesili sa tulai mai i nisi o matua, poo fai se galuega ale komiti oloo gafa ma le polokalame i tausaga uma e ala lea ile latou faailoa o mea oloo sese ai nisi o aoga e ala ia latou tapenaga ua le mafai ai ona latou ausia le tulaga maualuga e tatau ona oo iai le latou finau ina ia maua le tulaga muamua e oo ile tulaga tolu.

O nai atugaluga ia o matua ma le aumaimoa sa oo iai le faaiuga ole vaiaso ina ua maea le Polyfest a fanau aoga.

Ole susuga ia Seumanu Matafai ose tasi o tamalii ole atunuu ua loa foi lona agavaa ma lona silafia ile aoina o polokalame ole Polyfest e pei ona ia tulai mai ai ose faiaoga ile Kolisi o Avondale i tausaga uma, na faaalia lona ia lagona faafetai ile Atua ile polokalame o lenei tausaga.

Sa ia viia foi le Atua ile iuga ua iai le tauvaga ole Polyfest ole 2017, aua sa tuu atoa foi iai le atoatoa o lana Kolisi i Avondale ina ia maua se tulaga lelei poo se tulaga maualuga ile tauvaga o lenei tausaga, ae paga lea sa lelei uma foi sauniuniga ma tapega a aoga taitasi sa auai.

O lana ia faafetai ile Atua ua maea le faamoemoe oloo sologa lelei ma manuia mea uma ile faatasi mai ole Atua, ma e viia le Atua i soo se mea.

Ile saunoaga ale susuga ia Asiava Atonio Tuipe‘a ose tasi o faamasino ole tauvaga ole Polyfest o lenei tausaga, na fesiligia e le tatou pepa i sona lagona e uiga i lagona ma manatu o matua oloo atugalu ai e ala lea ile iuga ole tauvaga e pei ona iai.

Ae na saunoa manino Asiava Tuipea ole latou galuega sa agai lava i vaega lautogia sa vaevae iai le tauvaga e pei ona aumai e le komiti. Ma ole tele foi o aoga taitasi sa le atoatoa uma a latou tapenaga sa iai, ae ole tele o nisi o aoga sa agai lava a latou tapenaga ile sini autu ma le faamoemoe e pei ona iai le tauvaga o lenei tausaga, aemaise lava ile mauluulu ma le pese autu ole aso.

Ose tasi vaega oloo taumafai iai le polokalame ole taumafai lea e toe momoli mai fati o pese faasamoa moni, e ese mai i fatuga faaonapo nei, aemaise ai ole tamafai lea ia aliali mai tu ma le aga faasamoa i totonu o taga o pese mauluulu e pei ole tautuina ole ava, valuina ole popo, ole olaga tautua faasamoa.

Ole sasa ma le faataupati o nisi ia vaega na saunoa iai Asiava Atonio sa tele lava ina maitauina e faamasino e taga tasi ai le tele o aoga i lona faatinoina ae pau le eseesega o nisi o aoga e maua uma tamaiti ao nisi o aoga sa fesasi ai solo nisi o tamaiti.

Ma ole togiina foi ole tauvaga, a iai ni mea e sese ma faaletonu ai le faatinoina e aoga o a latou sauniuniga ona tusi lea e faamasino oni a latou manatu faalia i luga ole pepa e faailoa ai i aoga le mea oloo faaletonu ma le mea e tatau ona toe faaleleia.

Ma o nei pepa uma oloo togi ai le tauvaga e uma ona latou tuuina lea ile komiti o tapenaga ole Polyfest aua le faamaopopoina o togi, ma o pepa foi nei e mafai ona faaoo lea i aoga taitasi e faailoa ai mea eleo lelei ona saunia ina ia toe tapena lelei mai ai aoga aua le faamoemoe ole isi tausaga e sosoo ai.

E lua vaega na faaautu iai le tauvaga o lenei tausaga

Tauvaga Tautalaga – Faaautu lea ile Saogalemu o Femalagaina i luga o ala tetele.

Tauvaga o Faafiafiaga Pese – Ia Faataua e Tupulaga tu ma aga faaaloalo faasamoa.

E lei mafai ona maua se fesootaiga ma le faletua ia Melegalenuu Ah Sam i lana telefoni i sona finagalo faaalia ile vaega oloo fesili ai matua ma le atunuu e ala lea ile toe fesootai atu i aoga oloo pito i lalo ole tauvaga i vaega e tatau ona toe faaleleia aua le isi tauvaga ile tausaga e sosoo ai.

E tofu lava le tagata ma lona lagona aemaise ai o lana ia silasila ile tulaga sa oo iai taumafaiga ale fanau ile vaiaso ua tuanai, e ese foi le silasila a faamasino i vaega sa tuuina mai ele komiti e togi agai iai le faamoemoe ole fanau.

Ae ose vaega na sili ona maualuga ai tapenaga o lenei tausaga ole fesuisuiai lea o toniga aemaise ai o taga eseese mai siva ma pese sa faaaogaina, aemaise ai o fati sa faaaogaina e aoga.

Ma le sini autu lava ole maua lea e fanau aoga uma ole nofo fealofani aemaise ai ole taumafai lea e apoapo mai measina ale atunuu e ala lea ile faatauaina ole Gagana Samoa, o siva Samoa ma pese Samoa e faaaoga ai fati Samoa tuai e pei ona masani ai.

E fa aso sa faafoeina ai polokalame o lenei tausaga lea sa amata mai ile Aso Lulu ile tauvaga tautalaga ale vasega 9 e oo ile vasega 11, Aso Tofi tauvaga tautalaga le saunia vasega 12 ma le vasega 13, Aso Faraile ma le Aso Toonai sa faatinoina ai loa tauvaga o faafiafiaga pese ma siva.

E 34 kolisi ma aoga maualuluga sa auai ile Polyfest lea e aofia ai aoga tuufaatasi a tama ma teine, o aoga a tama faapea ma aoga a teine.

O lenei polokalame atoa sa amataina lava ile sauniga lotu na taitaia ele susuga ile faafeagaiga ia Rev Lale Peteru mai le Aso Lulu seia oo ina faamaeaina lenei faamoemoe ile Aso Toonai.

O susuga i faamasino sa gafa ma le faamasinoina ole tauvaga ole faletua ia Vini Afutoto Lale Peteru, Frances Betham Ieremia, Muliagatele Vavao Fetui, Tofilau Siliva Gaugatao ma Asiava Atonio Tuipe‘a.

Iuga ole Tauvaga Polyfest 2017 i lona Aotelega – Fata a Samoa

Aoga Teine

•Kelston Girls College

•Auckland Girls Grammar School

•Marist College

Aoga Tama

•St Pauls College

•Sacred Heart College

•Kelston Boys High School

Aoga Tuufaatasi

•Mangere College

•Manurewa High School

•Avondale College

Comments

comments