Ole vaiaso nei e tatau ona maua ai se taunuuga o suesuega faalotoifale a leoleo ini laau malosi se lua e aofia ai le fana ole ituaiga ole AK-47 e lē faatagaina i Samoa oloo teu ile nofoaga o aupega a leoleo.
Ole tasi o aupega lea e lē o iloa poo le ā tonu le ituaiga, na faaalia ele sui Komesina le afioga Afamasaga Michael Soonalole, sa maua ise sailiga a leoleo ise vaa faila na afea Samoa. Ole isi aupega le fana ole AK-47 na taofia ele ofisa ole tiute ona latou ave lea i leoleo e faaleaga ona e faasā i totonu ole atunuu lea ituaiga o laau malosi.
Ua faaalia ele sui Komesina na oo atu ia te ia faaseā mai nisi ole atunuu na latou vaaia lea aupega o feaveai ele Komesina o leoleo pe a faatino osofaiga tau fualaau ma laau faasāina. Ole toatele foi o tusitala na fesiligia le sui Komesina pe o iai se faatagana o leoleo e umia ai lea aupega. “Ina ua oo mai le mataupu ia te au ma ou tilotilo iai, na faia ai loa la‘u faaiuga e faia se suesuega ele vaega o amioga taualoa ale Matagaluega (Police Professional Standard Unit). E tatau ona maua se faaiuga o lenei suesuega ile vaiaso fou (vaiaso nei), ona e lē tatau ona umi”, ole finagalo lea ole sui Komesina ina ua maua se avanoa e fesiligia ai e tusa o lenei mataupu.
Ole tausaga ua mavae na faia ele Komesina o leoleo oloo faamalolo lē tumau se polokalame e faafoi atu ai e tagata ni fana e lē faatagaina i Samoa oloo latou umia ae leai ni moliaga solitulafono.
E faapea foi ni laau malolosi e faataga ile atunuu ae e lei lesitalaina ma ose avanoa e lesitala ai loa ma faamauina i faamaumauga o laau malosi oloo umia e tagata ole atunuu. Ole taimi lea na faaalia ele sui Komesina na oo atu ai laau malosi e lua oloo mafua ai le suesuega.
“Ole tala lena ua oo mai e masani ona ave ele Komesina le Ak-47 pe a alu ini osofaiga o fualaau ma laau faasāina”. Ua faamaonia mai foi ele sui Komesina ua lesitala le laau malosi ile igoa ole Matagaluega o Leoleo ae e lē talafeagai.
“O lalo lava ia ole tulafono ua na ole Minisita o Leoleo e iai le malosiaga faaletulafono na te faataga ai le faaulufale ile atunuu oni aupega e lē faatagaina, peitai e lē o manino le tulafono poo ā tonu ia aupega”.
Ole a ono faia ni moliaga pe a mae‘a le suesuega pe afai e mautinoa ose auala solitulafono na mafua ai ona lē faaleagaina ia laau malosi ile taimi na faia ai le polokalame ole arms amnesty.
O ai tonu e molia ole a faatoa iloa pe a taunuu le faila ole suesuega ile sui Komesina o leoleo oloo tauaveina nei le tulaga ole vaaia ole Matagaluega mole masina e tasi, a‘o lei oo le faasologa ise tasi o Komesina lagolago ole a sosoo ai ole afioga Fauono Talalelei Tapu.
