Sa matuā faatumulia le Hall a le Ekalesia a le River of Life Church, Slacks Creek i Logan i le po o le Aso Faraile, 3 o Tesema i le polokalame a le Elevate Youth Challenge 2010.
O le faamoemoe autū lava o lenei Polokalame na amataina mai le tausaga talu ai, 2009 ina ia mafai ona ola manumalo mo Iesu mai tuinanauga ma fiafiaga o lenei olaga, ia tupulaga talavou a le ekalesia ma soo se talavou.
O lenei polokalame o se Tauvaga Siva Hip Hop Faaleagaga, ma e matautia se tulaga na ausia e ausiva uma sa tauva ai. E lei faigofie le faamasinoga a faamasino e toalima na o latou faamasinoina lenei tauvaga.
E sefulu ma le lua ausiva sa tauva ma na tulai mai ai le Ausiva a le Julliettes i le Tulaga Tolu na mauaina le faailoga tupe e $1000 ma le ipu.
Na tulai mai 1,2 Check i le Tulaga Lua na mauaina le faailoga tupe e $2000 ma le ipu, ma le Siamupini o le Elevate Youth Challenge 2010, o le ausiva a le Ultimatum na maua le faailoga tupe e $3000 ma le ipu.
O nei ausiva na mautulaga o ni ausiva o loo tele ina tauva ma auai i le tele o Tauvaga Siva Hip Hop i Kuiniselani ma Ausetalia atoa.
O le Tamaitai Siva Maoa‘e o le tauvaga, o Jelisse mai le Ausiva a le Julliettes, ma le Alii Siva Maoa‘e o Jayden mai le 1,2 Check. O le ausiva a le Under the Influence mai le Ekalesia a le River of Life i Slack Screek na mauaina le Faailoga o le Togiga Maoa‘e le matagofie.
Sa peseina foi viiga o le Atua e se tasi o Alo o le tatou atunuu ua lauiloa foi i musika faaleagaga le susuga ia Lemalu Peni Anae na malaga mai Samoa, ona o le fia molimauina o lenei lava faamoemoe.
Sa matuā faamanuiaina foi tagata ma Tupulaga talavou uma sa auai i le Upu a le Atua sa folafolaina e le susuga i le faafeagaiga ia Siagigi Vaafusuaga mai Samoa, e luitauina ai i latou e pei ona faaautuina ai lenei polokalame i se autū e faapea, “Discover the champion in You” poo lona faa-Samoaina, “Ia e iloaina o oe o le Tagata Manumalo”.
Sa vaaia le lolofi mai o talavou e fia ofoina o latou soifua mo Iesu i lea po ina ua tuuina atu i ai e le failauga le avanoa ma e sili atu ma le 100 i latou na talia le Faaolataga a Iesu i o latou olaga.
O le Autalavou a le Harvest Worship Centre i Logan o le “Jesus Proclaimers Youth” o loo taitaia e le susuga a Tane Lokeni ma le Ekalesia a le River of Life sa galulue vaavaalua e faataunuuina lenei faamoemoe. Na faatalanoaina le susuga ia Ps Anthony Mauinatu i luga o le leitio Penina o Asuisui e tusa ai ma le polokalameina o lenei tauvaga sa uigaese le faatumulia.
