Ea le pologa o Samoa e talosaga visa mo Amerika

O le tuanai o le faalavelave ia Setema 11 o le tausaga e 2001 lea na osofaia ai Amerika i ni faalavelave faaterorisi na matuā faigata ai ona maua ni visa e malaga asiasi ai i lea atunuu.

O le faigata o visa mai isi atunuu sa aofia ai ma Samoa auā na manaomia le malaga o tagata uma ua talia talosaga i le ofisa o Amerika i Niu Sila e fai ai faatalatalanoaga poo interview ma faatali ai le maua mai o le tusifolau ma le visa, ia poo le maua mai foi o le tali ua lē talia ma ua lē maua se visa.

O se faiga sa ilitata ai o tatou tagata ona ua tele tupe ua alu ai i le tau malaga e faatino ia vaega uma. O lea la ua alu alu tausaga ae ua toe faafaigofie mai e lea Malo malosi le faiga o talosaga, ina ua faafou le faiga o talosaga poo le system lea e selau afe tala Amerika na faatupe ai. Faaalia e le sui o le Malo o Amerika i Samoa le susuga Peter Ganser, o le iai o se suiga fou i le faatinoga o le galuega ua taofia ai le toe tau la‘u i le ofisa o Amerika i Aukilani Niu Sila o tusifolau ma talosaga e iloilo ai ma faia ai faaiuga i le talia ma faapipii ai loa ma faailoga o visa asiasi poo visa mo aoaoga.
Ua mafai nei foi ona faatelevave le faia o faatalatalanoaga mo talosaga o ni visa ma ua faia ai foi ma visa i le ofisa o Amerika i Samoa.

O se tasi lenei o tulaga sa finauina e le Malo o Samoa le Malo o Amerika e silasila i ai ina ia mafai ona toe faafaigofie feuiuia‘iga mo le talosagaina o ni visa malaga aemaise lava o visa e asiasi ai i aiga faapea visa e fia maua i taimi o ni faalavelave poo ni siiga ma‘i.

O le tausaga fou e mautinoa o le a sologa lelei ai lenei faiga fou ua siitia ai galuega o le faia o talosaga mo visa mai Samoa mo Amerika auā o le a lē toe umi se taimi o faatalitali se tagata mo se tali o lana talosaga i le talia ma le teena o le maua o sona visa mo Amerika.

O le a faigofie foi mo tagatānuu o Tutuila ma Manu‘a o loo talosaga ni visa pe a fia ulufale i le Iunaite Setete o Amerika. O loo talosaga lava i latou mo ni visa tusa lava poo ni tagatānuu o Amerika Samoa seia vaganā tagata Tutuila ma Manu‘a ua maua o latou sitiseni poo le tulaga tagatānuu Amerika o loo faigofie.

E lē taumate o le a siitia ai ma le numera o tagata mai Samoa e fia malaga asiasi i Amerika auā o lea ua faigofie talosaga mo ni visa.
Le sui o le Malo Amerika i Samoa susuga Peter Ganser itu agavale ma nisi o le ofisa o Amerika i Apia a o faailoa mai le mafai ona faia i Samoa o talosaga ma maua ai lava visa asiasi mo le Iunaite Setete o Amerika