E tupu olaola le tagata amiotonu e pei o le pama

O galuega lelei ma manuia ua sapi ai nei alo ma fanau, o ai se na te lē fia taui atu i nisi galuega lelei? E ao lava ona faataunuu mea tonu uma a o mafai ona molimauina e sulu o o latou tino, auā se ā ea le aogā e toe saafi ai pe a oo ina oo mai le pogisa ma tofāfā atu i tiasā? O le saunoaga lea a le faletua ia Sarai Lui, o le ulumatua o le nofoaalo a le tina matua ia Puaseisei Fagalele Samia Siafolau a o tapena atu sauniuniga o le aso soifua.

O le Aso Sa, aso 12 o Mati na potopoto ai aiga, uo ma ē masani faapea le ekalesia Metotisi i Bundamba e molimauina le faamanatuina o le 88 tausaga  o  le soifua o se tasi o toe ulutaia, le tinā matua ia Puaseisei  Fagalele Samia Siafolau mai Matautu Falealili.

O loo pule alofa le Tamā o i le lagi e faafouina pea le malosi ma le soifua tulu‘i o le tamā o le aiga ia Mapuifagalele Samia Siafolau mai Satitoa Aleipata, ina ua savalia foi le 90 tausaga o le soifua.

O le maualuga o le silasila ma le tautua lotu o lenei tinā matua i lana ekalesia Metotisi, o le ala lea na tonu ai le filifiliga i le aiga e faia le sauniga faapitoa i le Aso Sa, i taimi o sauniga masani ma faafoi ai le mua ma le viiga i le Tasi Tolu Paia i le lagi ona o lana pule faasoifua ia te ia.

Na mae‘a sosoo ai ma le taumafataga tele sa tapenaina e alo ma fanau auā le afioga i le Sea ia So‘ofa ma le faletua ia Logotaeao Mulipola faapea le paia i le Ekalesia Metotisi ma le auvalaaulia.

E toa sefulutasi le nofoaalo ma na saunoa Sarai o le ulumatua a Puaseisei, i le tuputupu a‘e i totonu o le aiga na ia molimauina ai si o latou tina o se tina e sili ona toaga ma mataala i ona tiute tauave.

O se tina loto alofa ma faamaoni ae afai foi e toatamai, e lē faatusaina le sauā, ae i tua atu o lena sauā, sa totōina ai se fatu sili ona aogā ma tāua ua manuia ai le tele o i latou le fanau.

O lona naunautaiga, ina lagona e ia o latou saafiafiga a o maua le soifua ma le ola.

Manuia tele le atoaga o lou 88 tausaga Puaseisei Samia Siafolau, mai lau ekalesia Metotisi faapea le nofoaalo ma le aiga atoa faasilisili mai si au tautoga le tamā matua ia Mapuifagalele Samia Siafolau.Viia le Atua ua mafai ona e laasia nei tausaga e tele o lou soifua!