Na o Samoa e tatau ona sisi ai le fu’a
E oo mai i le Aso Sa na tea nei, 5 o Iuni na faataunuu ai le sauniga o le faamanatuina o le Sisigafu‘a a Samoa i Aukilani, o loo iai lava se feeseeseaiga i le va o le Konesula o Samoa ma le Fono Faufautua i le faatinoina o le polokalame o le Fu‘a.
E ui i lea tulaga ae sa faataunuu lava le faamoemoe e pei ona atofaina. Na amata ai ile sauniga lotu o le Sisigafu‘a sa taitaiina e le toeaina ia Rev Leiite Setefano o le Ekalesia PIC i Glen Innes, ma nisi o susuga i faafeagiga ma o latou faletua mai Ekalesia eseese Samoa i Aukilani faatasi ai ma sui o le Mafutaga Soofaatasi a Faifeau Samoa.
O se sauniga mamalu ma le faatumulia i le toatele o tagata sa auai e molimau ma sii faatasi le faafetai i le Atua ona ua aulia le atoaga o le 54 tausaga talu ona tutoatasi Samoa mai pulega a isi atunuu, ae sili ai le matagofie o tapenaga a aufaipese e fitu lea sa lagiina viiga o le Atua a o faagasolo le sauniga, e aofia ai le aufaipese mai le PIC Papakura, Metotisi i Wiri, Metotisi St Paul Otara, EFKS Puaseisei Magele, Holy Cross Papatoetoe, Aso Fitu Tutoatasi Magele faatasi ai ma le PIC i Tamaki.
O le tumutumuga ma le atoaga o le sauniga o lea po o le upu faauuina a le Atua na mānavaina e le taitai o le sauniga ia Rev Leiite Setefano, lea sa ia toe faamanatu ai ia Isaraelu, ia e manatua foi na fai oe ma pologa ia Aikupito, ae sa ia toe faalautele mo Samoa ma ona tagata sa faafofoga i lea po, ia manatua Samoa sa fai oe ma kolone i isi atunuu, ae faafetai i le Atua ua mafai ona aumai le pule ia Samoa e tutoatasi ai mo lana faigamalo.
Ma e lē galo foi le tāua o le toto maligi a tuaa ua fai i lagi le folauga na saili malo mo Samoa.
O le saunoaga mulimuli o le po, na saunoa ai le Konesula o Samoa ia Faolotoi Ruepena Pogi e uiga lava i le Sisigafu‘a, lea na ia toe fofola ai le fala e uiga i tusitusiga o loo agiga i luga o le nusipepa poo ai e pule i le Sisigafu‘a, faatasi ai ma nisi vaega o le fono a Samoa sa ia taumafai e tuufaatasi.
O le tulai mai o le saunoaga a le Konesula i lea afiafi, na ta‘ape gugulu ai nisi o le atunuu i le lē fiafia i le mea o loo tulai mai i totonu o le lotoifale o Samoa i Aukilani.
Sa maua foi i lea afiafi i nisi o sui o le Fono Faufautua le lē manao o le Konesula e sisi le fu‘a i le Aso Gafua e sosoo ai. I lona lagona na o Samoa lava e tatau ona sisi ai le fu‘a e faamanatu ai le tutoatasi o le atunuu.
I le tulai mai ai o lea vevesi ua tauau ai ina sola lagona o tagata e lagolago i se isi Sisigafu‘a e toe fai i se isi tausaga, ma sa faatalitali pea i le Aso Gafua poo le ā se mea o le a tupu, pe oo ona sisi se fu‘a pe leai.
O le faagasoloina o le polokalame o le aso na toe vaaia ai le militino faatasi o le Konesula ma le Fono Faufautua i le faatinoina o le polokalame, ma sa toe sisiina ai lava le tagavai o le atunuu e pei ona pepese ai le failipu a le PIC mai Avondale i le lagiina o le vii o le saolotoga o Samoa ma Niu Sila. Ua suia lagona o lea taeao ina ua agiagia le tagavai o Samoa, ua lē gata i le saolotoga ua tuuina i le atunuu ae ua avea o se taeao fou, o se amataga fou i tagata lautele e manumalo ai agaga e tutu faatasi mo se manuia o Samoa mo le lumanai.
Na toe saunoa foi le Konesula i lana saunoaga mulimuli i le aso ananafi ia faagalogalo i ni futia sa tulai mai, o ā foi ni faaletonu ia tanumia lava i le Aso ua sisi a‘e ai le tagavai o le saolotoga o le atunuu, ae sagai ane ai o le tai e tuli se ‘ai mo Samoa. E tetele lava pesega ae matua lava i le oo.
