E tele faaosoosoga o le galuega

Father Andrew Atonio (ogatotonu) mai le Palisi o Onehunga
Father Andrew Atonio (ogatotonu) mai le Palisi o Onehunga

O le loto viivii ma le agaga faafetai o le Afioga ia Father Andrew Atonio ile Atua ona o tausaga e 25 ua ia aulia o lana tautua ofo ma le tautua galue ile Atua ma lona finagalo, na ia saunoa ai e faapea, e lē o so‘u malosi poo so‘u poto ua maua ai nei tausaga e tele o la‘u galuega a‘o le Atua ua ia faia mea uma mo a‘u, ma ua ou iloa ai e itiiti mea tatou te faia mo Iesu pe a faatusatusa ile faamaoni o lona alofa ma lana tausiga a o iai i aoga i totonu o Roma seia oo mai lava ina faauu e avea ma Patele e talaiina le finagalo o le Atua.

Ina ua ia aulia nei tausaga e tele na ia lagona ai, ua na o le taulaga o le Misasa e fai i le afiafi o le Aso Lulu i totonu o lana Palisi i Onehunga e patipatia ai le alofa ma le agalelei o le Atua ia te ia e tusa ai ma lona ola ofoina mo ia.

Ae peitai ina oo i lea afiafi ua lē mafai ona tuua le loto fiafia ma le agaga faafetai o le Palisi ile galuega lelei a Patele Andrew Atonio oloo fai i agaga o le lafu mamoe, ma latou saunia ai se taumafataga tele ma ni meaalofa e faailoa ai le alofa moni ma le loto ua tumu ile fiafia ma le malie i mea ua ia faia.

Ua fefiloi atunuu eseese oloo iai ile Palisi a Onehunga i lea po e aofia ai Tonga, Samoa, Initia ma Palalagi aemaise o uo ma ē masani sa auai e faaali laufofoga fiafia ma molimau le faamaoni o le Atua i lana auauna ia Father Andrew Atonio.

O nei fuafuaga sa tapena faatopetope i le lua aso e le afioga i le aloalii ia Galumalemana faapea le Palisi atoa, ae sa molimauina le matagofie o le faamoemoe ina ua tali valaau le toatele o afioga i alii Pelepitelo sa auai faapea le kalapu a Malisi faatasi ai ma uo ma e masani.

O faafiafiaga a le autalavou ma meaaalofa sa tuuina atu i lea po sa fai lea ma faamanuiaga ma le alofa faatino mo Patele. O le tumutumuga o le mafutaga na tali faafetai ai Father Andrew Atonio i lana Palisi aemaise o uo ma ē masani sa auai.

Talaga Puupuu i lona Soifua

O le 14 o tausaga o Father Andrew Atonio na tautua ai i totonu o lana Ekalesia Katoliko i Vailele e avea ma tali Misasa i lotu ile Aso Sa, ma o lena taimi sa vaavaai ai lava i galuega ale faifeau ile osiaina o le taulaga paia o le Misasa, na amata mai ai lona naunau e fia avea o ia ma Patele.

O lona ia olaga atoa a‘o laititi e leai sona iloa ile tele o mea o le lalolagi, auā na o le alu lava ile aoga ma toe foi ile fale. O nisi o taimi, a inu sana iputi ma ‘ai sana falaoa ona nofo lea ma faataitai galuega a le faifeau o loo fai ile taimi e osi ai le taulaga, ma oo ai lava ina tumau i lona mafaufau e fia avea ma Patele.

O le tausaga e 1984 na valaauina ai i latou e to‘a 20 oloo taumafai mo le tofiga, e o atu ise mafutaga e tasi le vaiaso ma le afioga ia Katinale Pio. Na uma le vaiaso lena e tasi ona toe faata‘ape lea i tua ae valaau i mātua o fanau nei e feiloai ma le afioga i le alii Katinale, ma o iina na logoina ai loa e Katinale Pio le tuaa o Andrew Atonio, le tofa ia Pauga Atonio, o lou atalii e lē aogā ona alu, e lē agavaa i le tofiga ona e laitiiti tele, ma e manatu faatamaitiiti, ae sa lē mafai ona talia e Andrew Atonio le faaiuga, sa toe fai lava i lona tamā e alu e fai ile Katinale o ia e fia alu e faifeau, ma na talia le toe oo atu o lona tamā.

O le 18 o ona tausaga na malaga ai loa i Italia i Roma e aoga ile tausaga lava lea 1984, e lei faigofie le taumafai e aoao le gagana Italia oloo faatino ai le aoga, ae lei iai foi se aso se tasi na alu alu ai le aoga ua iai sona manatu e toe fia foi mai i lona aiga.

E 7 tausaga sa aoga ai i totonu o Roma ma faauu ai loa ile tausaga e 1991 e avea ma Patele. E tele luitau sa feagai ma ia a o iai ile aoga. E ta le logo ile taeao ua tatau ona ala i luga e tapena le moega, e aua lava ne‘i maua mai se isi e lei nofo i luga pe leaga le tapenaina o le moega auā o mea uma ia sa faasino ia latou e tausisia.

Tele foi isi galuega ma tulafono sa suesueinaa ai latou e ala i le malosi ma le ola faatuatua, ae sa fai fiafia lava lana aoga ma lona talitonuga ua alu lava ma lona loto atoa e fai le galuega ale Atua.

E to‘a 20 i latou sa o, ae fai ane le faauuga toe to‘a 13 i latou oloo totoe. Sa ia toe manatua ai le faamalosi au a le alii Katinale a o tapena e o i le aoga. “ E tu lava le tagata i ona vae, aua nei tu fua le isi i seevae ma vae o le isi tagata, o lona uiga aua nei mulimuli fua le isi tagata ae fai lava oe ia i le mea o lo e alu e fai. E iai taimi e pisa ai tamaiti i le tele o galuega ma le faigata ae sa le ano lava iai ona o loo ia taumafai lava e tulituli le mea na ia tuua ai lona aiga.

Na uma le faauuga i le 1991 ona tofia faatasi lea o ia ma nisi o faifeau e toatolu e galue i se tasi o falemai tele i Saint Philip Neru i le tausaga e tasi, ona toe tofia lea e vaaia se tasi o Palisi i totonu lava o Roma i le lua tausaga.  E lua foi tausaga sa toe malaga ai faatasi ma se tasi o Patele Samoa le afioga ia  Patele Talipope i Jamaica, ona toe foi lea i Roma ma pule i tamaiti aoga i le vaega o le Novesia i le isi lua tausaga. Na tofia e vaaia tamaiti ua o i le Seminalio i le tolu tausaga, ona sosoo lea ma le isi 3 tausaga i le isi Palisi i Italia.

O le 2004 na tofia ai loa e vaaia le Palisi i Tutuila i Leone ma le itu i Sisifo, o le 2008 na siitia ai ile isi pito o Tutuila i Fagatogo ma e iva tausaga sa galue ai, ma toe maua ai le isi fesuiaiga ma filifilia ai loa e malaga mai i Niu Sila ile 2013 e vaai le Palisi i Onehunga e pei ona galue ai ile taimi nei.

E tele faaosoosoga ma tofotofoga ile galuega, ae o lona loto faafetai i le Atua ona o lana puipuiga ma lana tausiga ia te ia, auā e iai isi tagata e alolofa moni, ae iai foi isi tagata e taumafai e lamalama e faaleaga le tofiga, ae o lona talitonuga, o le faifeau lava ia e tatau ona nofo sauni i taimi uma ma tatalo auā o le tatalo o le aupega sili lea ona tāua e tetee ai le fili ma ana faaosoosoga.

O le galuega foi oloo galulue ai o le galuega a Iesu, e tatau ona faalagolago ia Iesu e aumai le poto ma le malosi e faatino ai lana galuega. O Father Andrew Atonio o le lona fā lea o le fanau e toalima a le tamā ia Pauga Atonio mai Vailele ma lona tina ia Silevelia Patelesio mai Letogo. Sa amata mai ana aoaoga ile Malisi i Mulivai ona see atu lea ile Kolisi i Sanele seia oo lava ina malaga e aoga faafaifeau i Roma. O lona loto ma lona mafaufau atoa e mamafa ia te ia le Palisi, ia tatau ona saunia lelei lotu auā agaga o tagata auā o le pitolaau lea a le faifeau na sau e faatino.