O Bod Arum oloo puleaina le alii fusu o Andy Ruiz, o ia foi ose alii lauiloa ma aloaia ile lalolagi ile faalauiloaina o fusuaga, na ia tautino e taunuu lava le fusuaga a Joseph Parker ma Andy Ruiz mole fusi ole WBO ise faatalanoaga, sa faia ma le Radio Live ile po ole Aso Sa.
Na ta‘ua foi e Arum, toe lava ole aso e faataunuu ai le fusuaga e lē o mautu ile taimi nei, oloo mananao le pulega a Parker e faataunuu le fusuaga i Aukilani ile Aso 10 o Tesema, peitai, oloo mananao matou e tuu atu ia Ianuari, ona o faaletonu oloo iai ile taimi nei i toleniga a Ruiz.
Ole faafitauli o iai nei mo Ruiz, o lana faiaoga Abel Sanchez oloo ia kolenia foi Gennady Golovkin ole siamupini ole lalolagi ile middleweight, ole masina o Tesema oloo faamoemoe foi e fusu ai Gennady Golovkin ma ole mafuaaga tonu lena ole mananao ole pulega a Ruiz e tolo le fusuaga ia Ianuari, ona e lē o maua se avanoa ole alii faiaoga e koleni ai Ruiz mo le la fusuaga ma Parker.
“Ua uma ona ma talanoa ma Dean Lonergan, oloo iai le vala i tulaga tau tupe, peitai oloo iai le faamoemoe e toe fai se isi ma talanoaga, oute mautinoa e maua lava se maliega ile faaiuga ole vaiaso lenei.” Ole faaaliga manino lea a Bob Arum ile talanoaga male Radio Live.
O Bob Arum o l faauluuluga ole Top Ranks, ose faalapotopotoga tele i totonu o Amerika oloo faafoe ma faasalalauina fusuaga ile lalolagi. E 6 fusuaga ile fusi ale WBO na tapena ma faalauiloa e Bob Arum, e vavalalata tele le sootaga a Bob Arum male WBO, e lilifa foi faaiuga ale WBO ise manatu o Bob Arum e faailoa atu iai.
E lē o iai se faanaunauga tele ole pulega a Parker e tolo le fusuaga ia Ianuari, ona ole vaitaimi lea o malologa, e faigata ona maua ni kamupani tetele e lagolagoina le fusuaga, auā e faalagolago le faatupeina o lenei fusuaga, i tupe e maua mai i pisinisi ma kamupani lagolago.
Ole masina o Fepuari e lē talafeagai foi, ona o isi polokalame tetele e lua oloo faafoe foi ele Duco Event, e pei ole taamilosaga liki, le NRL Nines, faapea le taaloga lakapi ale Global 10’s i Brisbane lea foi oloo auai le Manu Samoa.
Na ta‘ua foi e Arum, ua mae‘a ona faia se latou talanoaga faasamasamanoa male WBO, ma e mautinoa lava le talia ele WBO ole fuafuaga oloo tapena nei iai. E talitonu Arum ose fusuaga mataina le fusuaga a Parker ma Ruiz, ma ua ia nofo sauni foi e malaga mai i Niu Sila.
E ese foi le vaai a Bob Arum ile fusu a Parker, o lona manatu o Parker ose alii fusu e malosi ma malo lona auvae, ae tuai lana fusu faatusa ia Ruiz e foliga mai ose tagata e tuai lana fusu, ae ole mea moni lava, e leai se isi tama fusu ole paga mamafa e pei o Ruiz le vave o ona lima.
Ole masina fou e faia ai foi le isi fusuaga e faafoe ma pulea e Bob Arum i Amerika, e fusu ai le alii lauiloa o Manny Pacquiao, ole isi lea avanoa e toe maua ai se latou feiloaiga ma sui ole WBO.
Ua iai le faamoemoe o Dean Lonergan e auai atu ile fono faaletausaga ale WBO e faia Las Vegas ile masina fou, ma ose avanoa lelei lea e aloaia ai se talanoaga male WBO mole fusuaga e pei ona fuafuaina nei.
Ole Aso Sa na tea nei na toe taliu ai i Las Vegas, Parker ma lana faiaoga Kevin Barry, e toe faaauau ana toleniga. Ole alii Mexico o Ruiz oloo tulaga tolu nei ile faasologa o tama fusu ale WBO, ua 29 ana fusuaga faapolofesa, 29 malo leai se faia‘ina.
