A o faagasolo faiga faapolokiki o le faigapalota mo le sailiga o se faigamalo e tauaveina le faafoeina o le malo o Niu Sila, sa lotolotoi ai lava le fesoasoani tele a le faalapotopotoga a tagata Pasifika, le Pacific Collective Network.
E tusa ma le ono masina talu ona faavaeina le mafutaga lenei ma faagaioi ai loa taumafaiga ina ia mafai ona faamalamalama atili tagata Pasifika i le uiga moni o le faananau ina ia malosi le lagolago ma ave le palota i le faigamalo a le National, auā ua alagatatau lelei lava ona suia le vaai ma le faamuamua mo le lumanai manuia o tagata o atumotu uma o le Pasifika.
O mau a le Pacific Collective e talafeagai lelei ma nisi o mau ma aiaiga a le National o loo faatāuaina ai le siosiomaga o le soifuaga o le tagata Pasifika.
Ua mae‘a nei la le faiga filifiliga a le malo nei, ua toe filifilia ai nei foi la le faigamalo a le National mo lenei foi paeaiga ma ua tatau ai lava le faafoi o le viiga ma le faaneetaga i le Atua e faafetaia ai lona finagalo alofa auā o lea ua ia tali faaaliali mai e tusa ma taumafaiga ma le galuega lagolago a le Pacific Collective mo le faiga filifiliga o lenei foi paeaiga.
O le afiafi la o le Aso Lulu na toe potopoto ai sui uma o le mafutaga a le Pacific Collective mo le lotu faafetai na faia ai le viiga ma toe momoli faapitoa ai le agaga fiafia i le Atua ina ua taunuu ma faamalieina le faamoemoe o le mafutaga, aemaise foi o se avanoa lelei lea na faaleo ai ma momoli aloaia ai le faafetai tele a le taitaifono le tofa ia Pa‘u Teleiai Edwin Puni, o sui o le laulau le afioga Tuilagi Saipele Esera ma le tofa Sooalo Setu Mua faapea taitai o le mafutaga ma sui sa taitaia le faafoeina o galuegafai mo le faigapalota mai itumalo taitasi.
O le saunoaga a le taitaifono na ia faamautuina mai ai e faapea o lea ua mae‘a nei le laasaga muamua (face one) o le mau a le Pacific Collective, ae ua faasauni nei la mo le faataotoina o tofa mamao ma lona tauiviina o le laasaga lona lua (face 2) e finauina ai manaoga ma moemitiga a tagata Pasifika e pei ona faataatia mai e tusa ma feiloaiga ma le Palemia afioga Toosavili John Key ina ia e faaoo atu ai i totonu o le taupulega a le faigamalo a le National mo Niu Sila e faia mai i ai ni fuafuaga talafeagai lelei ma manaoga o tagata lautele o le Pasifika.
O lenei mafutaga o le a faaauauina pea e logopuialiiina ai fuafuaga faataatitia auā le faataunuuina o tofa mamao ma moemitiga e pei ona ua faamautuina nei ma tulitausi‘a pea ma le faigamalo nei ina ia faamalieina manao mo nai o tatou tagata ma faapena ona tatou soifua tutusa lelei ai ma isi foi tagata o loo alala ma aumau i Aotearoa nei.
Na maua foi le avanoa lelei i lea afiafi na faalauiloa atu ai e ala i le auaunaga a le alaleo a le leitio Samoa (1593AM) le loto fiafia ma le agaga faafetai tele a le ofisa mamalu aemaise o taitai o le Pacific Collective, faapea le mamalu ma le paia o sui uma o le mafutaga ona o le lagolago a nai o tatou tagata e ala i le palota lea ua a‘e malo ai le tautaiga ma ua toe tulai mai le afioga Toosavili ma lana faigamalo mo lenei foi 3 tausaga.
