Ole aoga maualuga a teine a McAuley High School i Otahuhu, oloo iai le aiaiga ile auai ile Polyfesitval i tausaga taitasi. Ma o lea aiaiga ua malilie autasi iai mātua ma faiaoga ia ta’ilua tausaga ma auai mai fanau aoga ile Polyfestival. Ole tausaga e faatinoina ai polokalame ale aoga lea e tele ina malaga ai le kulupu Samoa i totonu o McAuley High School i Samoa ia latou soo ma nisi o autalavou poo nisi foi aoga, ma le tausaga e auai mai ai ile tauvaga lenei ole Polyfestival.
Ole tausaga nei o lea sa toe faatasi mai ai foi le aoga maualuga lenei a McAuley High School i faalagamaea ole Polyfest e pei ona finau ai le tele o aoga. Ole tausaga ese lenei ile malaga mai a McAuley High School ile finauina ose latou avanoa ile tulaga muamua. Pei ona iai le faagasoloina o polokalame a aoga a teine, e fitu aoga sa auai ile tauvaga a aoga a tamaitai. Peitai ane e leai se aoga a tamaitai na faatamala se tapenaga, ae ole mea ua tupu, e ese mai lava sauniuniga ale aoga lenei mai aoga uma sa latou tauva. Ole tele o vaega na agai iai le togiina ole tauvaga a aoga a tamaitai, sa seei mai lava le aoga a McAuley High School ile tulaga muamua seia oo mai lava ile tuufaatasiga o togi o vaega taitasi e laualuga ai lava maka o McAuley, ma o lea na sola ai ma le siamupini ole tauvaga a aoga a teine.
Ile talitonuga ale tofa ia Tauanuu Sealiimalietoa Perenise Tapu ose tasi o tamalii oloo faiaoga i totonu o lea aoga, e faapea, ole tele o iuga o lenei tauvaga i tausaga ia e auai mai ai McAuley, latou te maua atu ai pepa o iuga a faamasino ma a latou tusitusiga i mea e ao ona toe faaleleia pe a toe auai mai le aoga ile isi tausaga. Ma o vaega la ia, e aumai ai lagona o faamasino e toe silasila iai le latou aoga ma mātua e toe lima ta’ita’iina ai tapenaga ale aoga auā le toe auai mai ile isi Polyfestival.
O lana galuega i totonu ole aoga pe a sauni McAuley ile Polyfestival, na’o le fatu lava o pese ma tusi, ae o fanau ua tofia ma ta’ita’i ile aoga poo le kulupu Samoa, o i latou ia e gafa ma le a’oina o polokalame. Na amata mai a latou tapenaga ile faaiuga ole tausaga ua mavae a’o lei tuua le aoga, lea sa toe polesi ma faamatagoife atili ina ua a’e mai le aoga i lenei tausaga. I togiga ose tasi lea vaega na vavaai mamao mai iai, ia saili se togiga e matagofie ma atagia mai ai le aganuu a Samoa, ma ia tau faaata mai ai le autu filifilia ole tauvaga. O lona uiga oloo taumafai McAuley e fesootai mea uma o lana tapenaga ia atagia mai ai le autu filifilia.
E lē tāua le laugatogi, ae ia tāua le alu ole tamaititi ua maua se a’oa’oga ma se mea aogā mai le polokalame ole Polyfestival, e ala lea i tautalaga, ma faafiafiaga mai aoga eseese.
Ole tele o taimi e faasoa ai le tofa ia Tauanuu Sealiimalietoa ile aoga a McAuley ile tāua ole tamaitai i totonu ole aiga, ole tamaitai ole malu ole aiga, ole tamaitai e lelei ai se mea, ole tamaitai foi e oke pe a iai se mea e faaletonu.
Auā o ituaiga mafaufau faaamoa nei a tatou, ua tauau ina mou atu i tupulaga nei, latou te lē o iloa lo latou tiute faatamaitai Samoa.
E a’oa’i lelei la e mātua ile va ma tuagane, va ma mātua, ole uiga o lea mea ma lea mea, ae pei e lē talitonu le tamaitai ile aoaiga ona e ese le olaga lea e ola ai. E tāua la i taimi faapenei ile tuuina mai ole autu o polokalame ole Polyfestival ae ua iloa ele tamaitai vaega na a’oa’o ai ia e mātua ma faiaoga, ole faigofie lea ona fesootai fanau aoga, mātua ma faiaoga.
Ole tausaga fou ua faailoa mai ai e le tofa ia Tauanuu e lē auai mai ai le aoga a McAuley High School ona o aiaiga ale aoga e pei ona iai, ae iai le faamoemoe e momoli mai Ipu ole tauavaga e faataunuuina ai polokalame ole Polyfestival ile tausaga fou 2019.
