E taga eseese foi le Aso Sa Paepae o le Fanau, e uiga eseese foi faatinoga ma le faaaogāina o taleni a fanau auā o le aso sa faapitoa lava lea ua fai ma aso e tatala mai ai le lototetele o fanau e faailoa mai le feau a le Atua e ala ia latou faatinoga. O le Aoga Aso Sa a le susuga i le faafeagaiga ia Tim Salamasina ma le faletua ia Fepuleai Lagi Toilolo sa vaaia ai le talenia tele o fanau auā o le polokalame o lenei tausaga sa tuu atu i aiga poo matafale o le aulotu latou te tapenaina le faatinoga. E laitiiti lava si Ekalesia ae matautia le faatinoga e fanau mai aiga taitasi o le polokalame o le Aso Sa Paepae o le fanau. O se polokalame fiafia ma le matagofie auā na vaaia foi le faatāuaina lelei e matua o le tapenaga o fanau i vaega uma mai lava i laei ma teuga a fanau.
O le tapenaga ina ia fiafia ma lalelei tamaiti uma ae na oo lava i le faatinoina mai o taumafa faaleagaga na matuā lava tapena aiga uma. O lea foi Ekalesia na mae‘a le lotu a le fanau ona mafuta faatasi ai lea i le toonai matagofie na tapenaina ma saunia lelei foi e le susuga i le faafeagaiga ma le faletua, aemaise le mafutaga a tina ma aigalotu o le Ekalesia.
