E suamalie lagona o le faaeaina

O nisi ia o upu sa faaautū i ai saunoaga ma le taulaga o le faafetai, sa molia ai lapalapa o malō e le susuga i le faafeagaiga ia Rev. Victor Pouesi, a o potopoto ma faatumulia le faleaiga o le Happy Days i Manukau, i aiga ma uo a le tamaitai ia Toaiva Iuliano, i le Aso Lua na mavae atu nei.
O lea faamoemoe sa tapenaina ai e le tofā ia Tauā Kapeteni Iuliano ma le tausi ia Faavae, se taumafataga e fiafia ai ma aiga ma uo ina ua tau lau o taumafaiga a si o laua alo le tamaitai ia Toaiva. Sa faauuina i lea aso i lona faailoga o le Bachelor of Arts (Sociology , major) mai i le Iunivesite  i Aukilani.
Sa faaalia lagona o le fiafia ma le faagaeetia o le tamaitai o Toaiva ona e lei faigofie le ausiaina o le faailoga tikeri ua faamanuiaina ai o ia.
Ae peitai e ui i ia fita ma faigata, ae e suamalie ma logo i tino matagi lelei ina ua tini le tauiviga ma tauaaoina i le sauniga na faia i le aso lava lea lona faailoga.
Ua avea foi lea o se mitamitaga e lē gata o le tapuaiga a nai ona mātua ma aiga ae o uo foi faapea le ekalesia o loo galulue ai, i le Taeao Fou, Puaseisei i Magele i Sasae. O le tamaitai ia Toaiva, o afioaga o nai ona mātua o Lalomanu Aleipata ma Saleaumua faapea Siufaga ma Pata Falelatai.
Avea foi lenei avanoa e momoli atu ai faamanuiaga ma le faamalō mai ou aiga Toaiva, e lē gata o le tina matua, si ou great-aunt ia Sela Fauoo, sa auai foi ma molimauina le faamoemoe i lena aso, ae o si ou Grandma ia Tasilesā Leulusoo i Sini, Ausetalia faapea ou mātua faaleagaga, le susuga ia Reverend Victor Pouesi ma le faletua ia Salome aemaise o lau autalavou ma le ekalesia, ae silisili ai alofaaga mai ou mātua ma aiga uma i Niu Sila, Samoa ma Ausetalia.