A uma ona tatou faia ose galuega ona tatou faapea ifo lea o i tatou oni auauna lē aogā ma le faatauvaa, ae faafoi le viiga ile Atua o lē e ona le malosi ma le mana faapea le tamaoaiga ua foaiina i o tatou lima e faatino ai o tatou fuafuaga.
Ole lagona lea ma le loto faafetai ole mafutaga ale 4SJS88 MA USO i Niu Sila ina ua taunuu mai ile fiafia ma le manuia ile siui ole faamoemoe e pei ona iai le sailiga seleni mulimuli a lenei mafutaga auā lava aoga ma faalapotopotoga i Samoa.
O lenei mafutaga o alo ma tamafanau sa a‘otauina i totonu o aoga eseese ale Ekalesia Katoliko i Samoa ae ua mafai ona galulue faatasi ma militino faatasi ma fausia lenei faamoemoe ona ole manatu lava ia lelei ma atiae tulaga manuia i aoaoga eseese a lenei Ekalesia aemaise ai o faalapotopotoga i Samoa e pei ole Mapuifagalele faapea Tamaitai Monike i uta i Vailima.
Ua tino le alofa ma ua faaalia le agaga ole Isaraelu moni ole susue pea lea ole faamalamalama ma vaavaai ile nofoaga na faafailele mai ai le olaga aoaoina ma maua ai le poto salalau ae lē gata i lea ole ola tautua mo mātua matutua faapea i latou ua ofoina o latou soifua mo le galuega ale Alii.
Ole po ole Aso Toonai 12 o Novema na faamae‘a ai le sailiga seleni mulimuli poo le Corporate Dinner lona lima a lenei mafutaga ile Maota o Samoa i Magele lea sa maitauina ai le toatele ole mamalu ole atunuu sa autovaa atu ma molimauina lea faamoemoe.
Ole maualuga ma le matagofie ole faatasiga ole po o nisi o malo faaaloalogia mai Samoa le afioga ile Tama aiga ia Tuimalealiifano Sualauvi II ma lana masiofo, o le afioga ile minisita ia Afamasaga Reco Tupai ma lana sui minisita ia Rimoni Aiafi, Minisita ia Tialavea Seinafo Hunt ae faapea foi ile tofa ia Su’a William Sio le faipule o Magele ma susuga i faafeagaiga.
Sa faapea foi ona malaga mamao mai ai ma le mafutaga a Malisi IiUeligitone ona o le fai uso moni lava ma le fia tautua mo aoga ma mafutaga i Samoa.
O le afioga ia Patele Felise Lemi na ia taitaiina le polokalame ile sauniga pupuu lea na ia faamalosi ai ile fetalaiga a Iesu e faapea, “o se ua aupito itiiti ua e faia iai se mea o au lava lea.” na momoli foi lana faafetai ma lana faamalo ile saili malo ma le finafinau o tama fanau ale 4SJC88 MA USO, ua le tasi ae ua atulasi le saili i mea lelei mo le manuia o aiga, nuu ma ekalesia.
Ole tofa ia Faimalo Muliagatele Aleni Stowers sa fai ma fofoga ole po ae ole afioga ia Leota Isaako Saufua ole peresetene ole mafutaga na saunoa e faafeiloai le mamalu ma le paia o Samoa ua potopoto.
O nisi o faafiafiaga eseese na suifefiloi ai le faagasoloina o polokalame ole afiafi lea sa tatalaina ele ausiva ale Ura Tapu Pacific, aufaafiafia mai Tahiti, Tatau Dance Group, ole susuga ia Vaniah Toloa faapea le faili ale G-Mana Band. O nisi o valevale alofa ole mamalu ole atunuu ae faapea i kamupani na lagolagoina lenei faamoemoe faatasi ai ma mafutaga a aoga na tauala lea ia latou siva Samoa na tauaaoina auā lava le fia fesoasoani ile faamomoe ale 4SJC88 MA USO.
Na maeu le faafiafiaina ole mamalu ole atunuu i tapenaga a lenei mafutaga ona ua lē gata i faafiafiaga ae ua matagofie mea uma ina ua salani ele taumafataga le galala sa iai ile atunuu i lea po.
Na taualuga le faamoemoe ile saunoaga faamanuia ale susuga ile faipule o Magele le afioga ia Aupito Su‘a William Sio e faamanuia ai ile mamalu ole atunuu aemaise ole mafutaga ale 4SJC88 MA USO ona o nei tapega.
Na sosoo ai loa ma le foaiina atu ele mafutaga ole au galulue ale 4SJC88 MA USO ole siaki e $100,000.00 i aao ole faatamā a Malisi i Niu Sila le afioga ia Tuifaasisina Tafili Betham, faapea le Felela ia Brother David faatasi ai ma le Peresetene a Malisi i Aukilani le afioga ia Leota Isaako Saufua, ma o ia foi na fai ma sui ole mafutaga e saunoa faafetai ile paia ma le mamalu o Samoa na autovaa atu ma lagolagoina le faamoemoe mulimuli ole 4SJC88 MA USO.
O lenei seleni ua mafai ona tuufaatasi ai tupe sa maua i sailiga seleni e lima e pei ona timuia ma laina ai lenei mafutaga i lenei tausaga, e fā sa faia i Aukilani ma le tasi lea sa nafa ma le Malisi i Ueligitone lea foi sa sii atu ai le fala siigata ale mafutaga i Aukailani.
E 9 faalapotopotoga i Samoa o lea ua fuafuaina e faasafua iai lenei seleni, e fitu aoga ae lua faalapotopotoga, e pei ole:
(1) – Nofoaga o Tagata matutua i Mapuifagalele
(2) – Tamaitai Monike i Vailima
(3) – Aoga Felela Malisi i Mulivai
(4) – Kolisi Sagato Iosefo i Alafua
(5) – Aoga St Peters i Falefa
(6) – Aoga St Therese i Lepea
(7) – Aoga St Joseph’s Leauvaa
(8) – Aoga St Therese i Safotulafai
(9) – Aoga a Sacred Heart i Safotu.
O nei faamoemoega uma sa mafai ona faataunuuina ona ole lagolago a nisi o kamupani e pei ole Radio Samoa, Lautofa ma le House of Décor, G-Mana Wholesale Autos, Le Talimanao Catering, Beer Samoa le Taula&Sama, Sleepwell NZ, Blue Waves, Shop Samoa, PC Accounting, FitLife, Sei Oriana SSAB i Magele, Marist Wellington, MBOPA Samoa i Aukilani ma le MBOPA Samoa mai Samoa.
Ole faafetai foi ale afioga ile Perestene ma le mafutaga ale 4SJC88 MA USO i faauluuluga o nei kamupani ona ole fai uso ma le fia tautua pea mo Samoa ua tuu au atu ai lo latou tauau e opogi le faamoemoe e pei ona fitaituga ai ma le mafutaga.
