O le toe sosooina o le tatou ripoti na tuuina atu i le vaiaso ua tuanai e pei ona faatalanoaina ai i luga o le leitio a le Penina o Asuisui 1197am le sooupu o le Miss Samoa Ausetalia, le afioga ia Muliagatele Filipina Petelo ma le faatamā, Patea Pesamino Taefu.
E lē o iai se tulaga o se tusitusilima ae o le galuega faatusitala ma le aufaasalalau, o le faailo o le fogatia o ripoti maumaututū auā le silasila ma le faafofoga a le atunuu i le tuufesili pea poo fea e mafua ai ae o le ā se auala e ono foia ai ni tulaga e ono tulai mai.
Na manino le mata o le vai e tusa ai ma le faatalanoaga na saunoa ai le sooupu, na ia saunoa ai, o le tulaga lava lea i tausaga uma e le sōsō se tasi i talane o faamasino se‘i vaganā ua mae‘a ona toe iloiloina lea e le komiti, lea la na maua ai le ‘ela o le vaega lea.
O lea la ua mae‘a ona toe iloiloina e le komiti faafoe ma toe suia ai le Miss Samoa Ausetalia mai ia Afiogatutasi Jessica Taulaga ae faapaleina ai le tamaitai o Tusipepa Sandra Lilomaiava.
Na fesiligia e le leitio le komiti i le po o le Aso Lulu pe aisea ua toe faia ai lenei faaiuga ae saunoa le sooupu, o se pa‘ela mai le faitauina o togi na toe siaki lava e le komiti ma fai ai lava le latou faaiuga.
Na maua foi se avanoa o le tina o le tamaitai na pale muamua e faailoa ai lona faagaulemalie i le faaiuga ua faia e le komiti ma ua mae‘a ona tuuina atu nei la latou tagi i le faamasinoga ae o loo tālia pea se tali. Na faaalia foi lona finagalo o lana ia fautuaga i ni alo tamaitai e fia tauva, e lelei lava le ō sa‘o i Samoa e tauva ai.
Na toatele finagalo na faaalia, pe ao ea ona liuliu se tofa ma se faautaga pe lē ua alagatatau ona suia le komiti faafoe pe iai foi ni suiga ina ia toe timata ai le upega a tautai a o folau ai le sā o le sailia pea o ni tamaitai lalelei o Ausetalia i tausaga uma, ae na faaalia e le sooupu o le Miss Samoa Ausetalia o i laua lava ma le tofa ia Talevu Koleta Galumalemana na uluai resitalaina i totonu o Kuiniselani le Miss Samoa Pageant lea o loo iai lava ia te i laua le faauluuluga e oo mai i le taimi nei.
O ni vaega e tutupu mai, e toe timata ai le upega a le tautai e faapea: Afai o ni vaega e toe fia faia se faaiuga ona o le teuteuina o le va fealoai pe fia faailoa se amiotonu pe toe iloilo se faaletonu, e iai ni fesili e ao lava ona fesiligia a o lei faia se gaioiga, O ni fesili: (a) Faamata o ai o le a fiafia ae faapefea le isi tagata poo le isi itu? Pe lē ono maasiasi ma mafatia? (e) E iai upu a le atunuu “E poto le tautai ae sese le atu i ama” (i) O le ā se iuga e ono tulai mai? Vevesi pe tausi le filemu? (o) O le ā se tulaga e ono oo mai? A o ai foi e aafia ai? (u) O ai e tiga ai ao ai foi o le a fiafia ai? (f) E tatau ona faia i ai se tulaga i lea vaega (g) O le ā se vaega e ono fai ma fautuaga mo le lautele a o le ā se laasaga e ono fofo ai le faafitauli a o ai foi e ao ona fofoina.
O loo iina le tofa ma le moe. E avea ai le nusipepa a le Samoa Times e faaleo atu ai se agaga o le loto maualalo i ni finagalo ua iloga ona o ‘oo‘o iai le tiga, ia faamagalo le komiti faafoe a le Miss Samoa i Brisbane i ni aleu, ae toe sagai ane ‘ai o le tai auā e poto lava le tautai ae iai lava taimi e sasi ai le tagata.
