O le feagaiga na osia e le Ekalesia Faapotopotoga Kerisiano Samoa le EFKS, ma le pulega o le kamupani o le South Pacific Cladding, sa latou faafou le tino o le maota o le Ioane Viliamu i Tamaligi i Apia, ua masaesae i le malosi o le agi o savili ma matagi to faata‘uta‘u.
Ua lua tausaga o faagasolo lea galuega na faia i ai se finagalo o le fonotele i Malua o le tausaga nei, e faamuta loa ae ave le faamuamua i le galuega o le Malumalu o le Iupeli i Malua. Na mafua lea finagalo o le fono tele ona ua mae‘a le taimi na faamoemoe e ma’ea ai le galuega ae o loo faaauau lava.
O le tuua‘iga a le kamupani e tuai le ekalesia i le tulaga tau tupe e oka ai le ‘apa mai fafo mo le galuega. O le tuua‘iga mai le pulega o galuega a le ekalesia e faiaga ma lē faamaoni le kamupani i le tuuina atu o faamatalaga i le okaina o ‘apa ma isi lava mau lavelave o le galuega.
E ui sa lukaluka le gataifale i le mafutaga ae sa vaaia lava le alu lelei o le galuega seia oo ina feto‘i ma tuai ina ua mae‘a le fono tele i Malua o le tausaga nei. Poo le masina o Iulai na molimauina ai ua lē toe gaioi le galuega ae o loo tutū pea pou paipa o fata o loo faaaogā e le aufaigaluega a le kamupani e faatino ai le galuega.
Peitai o le vaiaso na tea nei i le Aso Gafua na vaaia ai loa ua toso le maea ma tiute ai alii sikulati i le nofoaga sa faagaioia muamua ai le ofisa o le South Pacific Cladding. Na siitia ese le ofisa o le kamupani ae faaaogā pea le vaega lea o le Ioane Viliamu e faagaioia ai nisi o pisinisi a le kamupani o se internet café ma se fale oti ulu. O se maliega na faia ma le pulega o le ekalesia i le taimi o avea le susuga Dr Iutisone Salevao ma Failautusi na faia ai ia pisinisi, ae sa leai se totogi.
Ina ua masae le laufa‘i a itu e lua na faatonuina ai loa e le pulega ua iai nei o le ekalesia lea ua avea ai le susuga Uili Afereti ma Failautusi le aveesea o pisinisi nei a le South Pacific Cladding.
E tele mafuaaga ua lipotia o lea faaiuga ae o loo iai se molimau talitonuina o se lipoti na faasalalau e le nusipepa o le Samoa Today o se isi lea o pisinisi a le kamupani o le South Pacific Cladding o le mafuaaga lea o le faaiuga e aveese pisinisi a le kamupani.
O le a lē agai se faamatalaga o lenei lipoti i le mataupu na faasalalau e lea nusipepa ona o loo iai se tuualalo mai le loia faufautua a le ekalesia e iai se taimi ona aumai lea i le tulaga lautele o se faamatalaga a le ekalesia.
O lea lipoti na faasalalau e le nusipepa a le kamupani o loo aliali ai ni tuua‘iga matuia ma ogaoga faasaga i le failautusi o le ekalesia aemaise o loo aafia ai foi ma le ekalesia aoao. Ua faaalia e le pulega o le kamupani o le a tuuina atu foi le latou mau i le tulafono e finauina ai le faaiuga ua tapunia ai le vaega o le maota o le Ioane Viliamu sa latou faaaogāina.
