O totogi mo faiaoga a le Malo o loo galulue i le motu i Savaii o le autu lea o se fonotaga a faiaoga uma a le malo i le motu tele i Salafai sa faia i le faaiuga o le vaiaso ua tuanai.
O le siitaga o totogi mo faiaoga uma a le Malo e pei ona pasia i le tala faopoopo o le tupe, e lei maua lava. E manino i atugaluga o faiaoga i Savaii o le leaga o le faaiuga a fanau i le suega o le Secondary School Leaving Certificate le mafuaaga o le tuai maua o le siitaga mo i latou.
O se feiloaiga talu ai nei a le Pule Sili ma ia faiaoga na ta‘ua e faapea, na pesi ai le lē fiafia o le Pule Sili, le Afioga Matafeo Tanielu Aiafi, i le faaletonu ona faatino o tiute o faiaoga, o le pogai lea o le leaga o faaiuga poo results a tamaiti.
O le taunuuga o le fono a faiaoga i Savaii i le Aso Toonai na tea nei, na faaalia e se molimau faatuatuaina, na lagona ai le lē fiafia o le toatele ona o saunoaga a le Pule Sili ua ta‘u faatauvaa ai le latou galuega ua manino atu ai i le latou faauigana, e lē o lelei ona faia o latou tiute faafaiaoga.
Ua autasi ai se finagalo e faia se teva poo se strike pe a lē vave maua le siitaga o o latou totogi sa faatalitali i ai mo ni tausaga ae o lea faatoa pasia e le Palemene i le tala faaopoopo o le tupe poo le supplementary budget lea na solaupule e le fono aoao faitulafono i le amataga o lenei tausaga fou 2014.
E lei manuia sailiga i se finagalo o le Pule Sili ae o loo ia faaalia i se lipoti a le Sunday Samoan, e na te lagolagoina se tulaga faapea pe a faatino e faiaoga. O loo faaalia ai foi e Matafeo i lea lipoti e tatau i faiaoga a le Malo i Salafai ona siitia le tulaga i le faatinoga o le latou galuega pe a mananao i se siitaga i o latou totogi.
Peitai o loo ia faaalia ai foi e lē taunuu se teva poo se strike a faiaoga ona o lea ua latou malamalama lelei a lē lelei ona faatino a latou galuega ma faamaonia i le taunuuga o suega a le fanau, e lē agavaa ona maua se siitaga i o latou faamanuiaga tau totogi.
O le amataga o lenei vaiaso ina ua toe amatalia galuega masani na fono ai le Pule Sili o le Matagaluega o Aoga ma le Minisita e fitoitonu i le matagaluega, le afioga Magele Mauiliu Magele.
E tuuina atu lenei lipoti mo le faasalalauina e lei maua se finagalo o le Pule Sili i se tulaga na taunuu i ai le la fonotaga. Peitai ua iai le talitonuga o mataupu faapenei pe a oo ina siisii le tai i finagalo o ni tagata o loo aafia, e mafai lava ona fofo alamea ma toe masuiga mālie ai ni faafitauli faalotoifale e faasino i totogi.
