Na manuia le taumafaiga a le alo tamaitai o le atunuu, Magan Maka i le la fetauiga ma le siamupni muamua a Ausetalia i le taaloga o fusuaga o le au paga mamafa, sa faataunuuina i le vaiaso talu ai.
O le taaloga i le va o le siamupini a Niu Sila, le tamaitai Samoa Magan Maka, ma lē sa umia le siamupini a Ausetalia Tammy Taylor, o se ata lelei ma le manino e taulai i ai mafaufauga ma le vaai mamao, i le agai mai o taaloga a tupulaga talavou a le lalolagi. O le a tulituliloa e le toatele ma i latou e fiafia i le taaloga o faipelega a tamaitai, le tulaga o le a toe pailima ai pe toe lu‘i ai e Magan, le tamaitai siamupini o le lalolagi o loo iai nei.
O le tausaga talu ai, sa faiaina ai Magan i le ‘ai e tasi i le la fetauiga e saili ai le siamupini, a o lea la o le a toe iloilo i le isi taamilosaga e pei ona faia i Turkey i le vaiaso nei lava. Na manumalo Magan i le siamupini muamua o Ausetalia Tammy Taylor i ‘ai, ma o se tapenaga lelei lea ma se aoga e toe faatonutonu ai le mafaufau o le tamaitai taalo, mo le toe luiina o le siamupni o le lalolagi. O le Aso Lua aso 19 o Aperila, o a taeao lea, o le a tuua ai e le autaalo a Niu Sila, lea e malaga ai Magan mo le taamilosaga e faia i Take e pei ona faailoa atu.
O loo maualuga pea le tulaga o le tamaitai o Magan, i le taaloga i le lalolagi atoa i le taimi nei, peitai e ui i lea tulaga lelei, a o le siamupini lava le faamoemoe e pei ona tulimataia e le tamaitai taalo, faapea foi lana faiaoga aemaise o le komiti ma le au taaalo a Niu Sila. O taaloga nei a le Youth World Champion, ua leva ona faagasolo mai, ma o se tulaga lelei tele mo le atina‘eina o taaloga ma taleni mo le lumanai, aemaise o le filiina o autaalo a atunuu taitasi, mo taaloga tetele i le taimi e faia ai. O Magan o loo ia tauaveaina pea le igoa o Niu Sila i le aupaga mamafa o fusuaga a tamaitai.
E pei ona silafia, o se tasi foi o alo o Samoa le susuga Henry Schuster, ua filifilia e le Asosi Fusu a Niu Sila e faiaogaina le au taalo e pei ona sauni e malaga, a o ia foi sa feagai ma le koleniina ma le faalauiloaina o taaloga a Magan i Aukilani ma Niu Sila.
O le ala foi lea na fesiligia ai lea tamafanau a le atunuu i sona finagalo, ma sana tagai i le lumanai ma le sauni atu o Magan i lea faamoemoe.
Na ta‘ua e Henry, o le agai i luma o le malosi i le tino ma le mafaufau o le tamaitai taalo, o loo ia matuā talitonuina ma lona faamoemoe maualuga e sola mai ma Magan le siamupini o le lalolagi i le latou aupaga. Sa ia maitauina taaloga ua mavae, atoa ai ma le fetauiga ma le tamaitai o loo umia le siamupini o loo fafagu ai pea lava lona lagona e mafai e Magan ona faatoilalo lē o loo umia le manumalo.
O lona finagalo e lē faamaualuga peitai o lana lea vaai, ma lona talitonuina o lana tagata taalo o loo talanoa i ai, ma faamalosi pea i ai i aso ma taimi uma, sa koleni ma sauniuni ai mo lea faamoemoe.
E lē gata i lea, a o le silasila lautele a le alii faiaoga mo le au taalo atoa a Niu Sila i isi taaloga, o loo iai pea lona talitonuga ma lona faamoemoe, o le a tele ni pine auro, o le a taliu mai ma Niu Sila.
E toatele foi nisi alo o Samoa, o loo tauavea le tele o isi taaloga i le taamilosaga lenei, ma o se sao tāua tele lea o Samoa mo Niu Sila ma le atina‘eina o le tulaga tau i taaloga, ma lona luamanai.
Sa ia ta‘ua foi o se tasi lava lea o ona mitamitaga, ona o loo malaga ma le toatele o alo ma tamafanau a Samoa, e pei ona filifilia i le autaalo a Niu Sila. Ia talosia le faamoemoe ua alo atu i ai le alii faiaoga ma lana autaalo, ina ia manuia ma toe foi mai ma le fiafia ma le manumaloina o ni pine auro.
