O loo tagai ma silasila toto‘a nei le alii Faiaoga o le ‘au malosi a le Sifi (Chiefs) Waikato, faapea ai foi alii o loo filifilia tama taaalo o le All Blacks (selectors), i se tasi o alo o Samoa, le alii o Joshua Tyrell, ona o lona tulai mai i le faatinoina o le taaloga lakapi i lenei vaitau.
O se tasi lea o atalii Samoa, sa maoa‘e lona agavaa ma lona malosi i le taaloga lakapi, peitai o manu‘a ma aafiaga o lona vae sa matuā aafia tele ai, le mafuaaga o le faatelegese ma le faatuai ona afea ma filifilia e tama matutua i le taaloga.
O le vaiaso na tea nei, na toe vaaia ai le tino o Joshua i luga o le malae i taaloga a lana kalapu a Malisi i Hamilitone. Ina ua maua se faamaoniga ma pasia e fomai manu‘a o lea alii e toe foi ai e toe amata ona faasaosao ma toe faamasani, ona talu ai ua leva o taofia ma e lei toe taalo ona o manu‘a sa aafia ai.
Na taalo Joshua i le fasefulu minute muamua o le taaloga a le B, ona toe faamalolo lea e sauni ai mo le taaloga a le A, a le kalapu lava a Malisi. O se faamatalaga na maua e le Samoa Times ina ua talanoa atu ia Joshua faapea foi lona tuaa, le susuga ia Lesagalala Apulu Aumatumua Tyrell, sa faamaonia ai, o lea ua toe amata atia‘e nisi taaloga, ma e manaomia le tele o taaloga a Joshua, ina ia toe faafoi ai lona tulaga lelei, ma lona malosi sa iai a o lei faataotolia i manu‘aga.
O le tele o taaloga moomia, o le vave foi lea ona toe fesootai ma sooa ona agavaa ma le malosi, ma o le a fesoasoani tele lea i le toe silasila ma faatumauina pea le tagai toto‘a i ai o le Pulega a le ‘au faaitumalo a le Sifi, faapea alii Faufautua a le Olopeleki.
O le alii o Joshua, sa uluai filifilia i le ‘au faavaomalo i lalo ifo o le luasefulu tausaga a Samoa. (Samoa Under 20).
Sa malaga foi i le taamilosaga faavaomalo i fafo i tausaga ua mavae, i le ‘au lava lea a Samoa. Peitai o le toe taliu mai, na fesuia‘i ai lona mafaufau, ona o ni tulaga sa lē fia ta‘ua e le atalii, ma ua matuā siilima ai, e le toe fia foi i le ‘au a le atunuu.
Sa ia ta‘ua e faapea, sa naunau tele e fia faaaogā lona malosi mo Samoa, peitai e iai lava uiga paaa ma faiga lē manuia e le tusa ma le vaai a tamaiti mai fafo, sa vaaia ma faatinoina e le pulega o le ‘au, ua matuā faauliulito ai lona manatu e le toe fia foi ia Samoa.
Sa fesiligia foi lona tamā, le afioga ia Lesa i sona finagalo, peitai sa ia ta‘ua, ua tuu lava le tama e fai lana filifiliga, ona ua matua ma ua ia iloa lelei foi le agai i luma ma le faaaogāina o lana taleni. Ua foi mai le tama i le ‘au a le atunuu e pei ona sa ia momoo i ai, peitai ua lē toe fia foi ma e iai foi mafuaaga tatau e pei ona ia faamatala.
E le mafai foi la ona ia toe faamalosia le tulaga ua iu i ai le filifiliga a le atalii. Ae lelei pe a tuu ai pea. Se‘i taumafai pe maua sona avanoa i ‘au a Niu Sila e pei ona ia tulimataia i lenei vaitaimi. A manuia, e ta‘u ai lava foi le igoa o Samoa.
O Joshua Tyrell, faatoa luasefulu ma le tolu ona tausaga, ma e le taumateina oloo lava pea lona taimi, ma e tele foi sona avanoa pe a fua ma vaavaai i ona agavaa ma lona malosi. E mafai e Joshua ona taalo i tulaga o le loka, ono, fitu ma le valu (lock, flanker, No 8).
