“E faigata tele ona ou talanoa atu. O taimi uma lava oute talanoa ai isi o‘u atalii e lagona lava lo‘u vaivai.” O le tala tuumumusu lea a Iafeta Matalasi ina ua fesiligia ele Samoa Times e tusa ai o le faalavelave na tagatavaleina ai si ona atalii o Alonsio poo Sio e pei ona valaauina ai ua 25 tausaga i Jackson Street Petone, ile aso 22 Aukuso 2013. O le taimi mulimuli na fesootai ai Iafeta Matalasi ma si ona atalii o Sio, o le uii foi lea o le aiga, o le feau tusitusia (text message) a Sio, na lafo i lona tamā o Iafeta e valaaulia ai ile aso fanau o le atalii.
E tolu itula mulimuli ane ae maua e Iafeta le tala faanoanoa, ua maliu Sio. O se feeseeseaiga ile va ose tasi o uo a Sio ma ni sui se toalua o le kegi a le Mongrol Mob, na taumafai ai Sio e fesoasoani i lana uo, ma lavea ai ise pulufana ma uma ai lona ola.
E toalua i laua na faamaonia i luma o le faamasinoga o la moliaga o le fasioti tagata, o Dillian Pakai 18 tausaga ma Shane Harrison 43 tausaga, o laua uma o sui o le kegi ale Mongrol Mob. O le aso na lauina ai faasalaga o laua nei e toalua, na tulai ai Iafeta Matalasi ma talosagaina le faamasinoga, ina ia faamagalo Pakai ma Harrison, ma ia aua foi ne‘i tuuina atu i laua ile falepuipui.
O le talosaga a Iafeta Matalasi e faate‘ia ai ona aiga, aemaise o le faamasinoga ma taitai o le kegi a le Mongrol Mob sa auai ile faamasinoga. E moni sa iai nisi sa o latou faaalia i luma o le faamasinoga le loto faamagalo ae leai se isi sa talosaga ina ia aua ne‘i tuuina atu se faasalaga faafaleupuipui ise tagata na fasiotia se tasi e pele ile loto. Na ta‘ua e Iafeta Matalasi, na faailoa atu e taitai o le Mongrol Mob lo latou agaga faafetai ma lo latou maofa ile talosaga na ia tuuina atu ile faamasinoga.
“E oo lava i o‘u aiga sa matuai lē fiafia ma lē malilie ia te au ona o la‘u talosaga, i o latou manatu ua sese le mea ua ou faia ae oloo tiga le aiga atoa ona o le oti o Sio, ae faapefea ona faamagalo,” o le saunoaga lea a Iafeta Matalasi.
Na ta‘ua e Iafeta, na ia talanoa i lona aiga, “E lē faatusalia lo outou tiga ile tiga lea oute nofo ma a‘u. O lo‘u atalii na apelepele na fofoa e o‘u lima, e pele ia te au lo‘u atalii auā o le uii o la‘u fanau. Afai o outou tiga ona ole oti o Sio, e sili atu ona ou tiga nai lo outou. Ae o le faaiuga ua ou faia e sau mai lo‘u loto, oloo silasila le Atua e moni lo‘u loto faamagalo.”
Na maitauina le mafatia o Iafeta Matalasi, a‘o taumafai e toe faafoi lona mafaufau ile taimi na tulai mai ai le faalavelave isi ona atalii o Sio. “Oute lē iloa faamatala i a‘u upu tiga na oo mai ia te au. Ua pogisa lo‘u mafaufau ua galo foi ia te au le Atua. Na pau lava le mea na oo mai ia te au, o le fia taui ma sui, o le mata ile mata, o le nifo ile nifo.”
“Oute tagi i aso uma, oute tagi ona o le ita, oute tagi ona o le alofa isi o‘u atalii, oute tagi ona o le misia osi o‘u atalii. Oute tagi ona ua fia pule nei tagata ma o latou aveese le ola ale Atua na aumai isi o‘u atalii. Oute tagi ona o lo‘u alofa ile fanau e toalua a si o‘u atalii, oloo laiti i laua, ae o lea ua oti si o la tamā, o le a tutupu a‘e i laua e leai se tamā.”
“E umi se taimi o o‘u tatalo ile Atua e fesoasoani mai ia te au ma o‘u mafatiaga. Sa ou tatalo ile Atua ia aumai se filemu i lo‘u loto.”
E talitonu Iafeta e lei tuulafoaina o ia ma lona aiga e le Atua, e ui ile matuitui ma le tiga ae sa ia lagona le papa‘i mai o le Atua. “O le isi aso sa ou nofo ma ou faataupupula atu ile fanau a si o‘u atalii, sa ou lagona le musumusu mai o le agaga o Sio ia te au, “Dad tuu le mea lena ete mafaufau e fai. A‘e alu atu nei ete taui ma sui, ma e oti atu ai foi ma oe, pe iu ane foi ua e falepuipui, o ai a tausia si a‘u fanau laiti.”
Na ta‘ua e Iafeta o le aso lea na suia ai ona lagona ma ia talia le loto faamagalo. Na ia iloa foi, a lē mafai ona ia maua le loto faamagalo male faamaoni, e lē mafai foi ona saoloto lona mafaufau ma lona loto e oo foi i lona soifua maloloina ua aafia ona o mafatiaga.
A‘o sauni e fai lana tautalaga i luma o le faamasinoga i aafiaga o ia ma lona aiga ona o le faalavelave na tupu (impact statement), e lei faailoga fesili lona mafaufau ile agaga faamagalo ua oo mai ia te ia.
O le mafuaaga lea na ia talosaga ai ile faamasinoga, ina ia aua ne‘i tuuina atu Harrison ma Pakai ile falepuipui, ua ia faamagalo ia i laua nei. “Ua silasila mai le Atua i lo‘u loto e moni lo‘u loto faamagalo, oute lē o faia ona o le vaaiga a tagata, ae ua ou faia ona ua ioe atoatoa iai lo‘u loto o lo‘u agaga ma lo‘u mafaufau,” o le saunoaga lea a Iafeta Matalasi ile Samoa Times.
Na ta‘ua e Iafeta, o tagata faapenei e lē toe aogā iai se falepuipui, auā foi ua o soo ile falepuipui ma tatala mai i tua ma toe fai foi isi solitulafono. Ae o lona faamoemoe, o le fesoasoani mai a le Atua e mafai ai ona latou galulue faatasi ma i laua nei, ina ia suia olaga ma ia faaaogā foi laua nei e fautuaina nisi o tupulaga e aloese mai olaga o kegi. “Pe toatasi pe toalua ni tupulaga e faasaoina mai olaga mai kegi, ua lava lea ma totoe mo a‘u, ae ia iai se aogā o le oti o Sio,” o le saunoaga lea a Iafeta. O le susuga ia Iafeta Matalasi, o se faiaoga lakapi ma afeleti i totonu o aoga, ma kalapu, na ia faailoa foi lona naunau e fai se galuega mo tupulaga ina ia alofia e i latou le olaga o kegi.
“Ua ou maitauina le fiafia o tupulaga e auai i kegi, ma oute fia fesoasoani i nei tupulaga, ia o latou iloa le leaga o le auai i kegi, ma mafatiaga o aiga ma tagata ua faaleaga e kegi o latou olaga.”
Na ta‘ua e Iafeta, o le taimi nei oloo faatali se iuga ale faamasinoga ile apili a le loia a le Malo faasaga i faasalaga faafalepuipui na tuuina atu ia Pakai ma Harrison, e lē o fiafia le loia a le Malo i faasalaga ua tuuina atu mo laua nei. E mafua lea ona e iai le vaega o le tulafono, e faatolu loa ona faamaonia se moliaga o se tagata i solitulafono mamafa, o le iuga e nofo ile falepuipui ile olaga atoa e leai se faamoemoe o le palola.
Peitai, ua mae‘a ona taoto atu i luma o le faamasinoga le talosaga a Iafeta Matalasi ina ia mafai ona tatala mai i tua Pakai ma Harrison, ini aso se taitasi pe lua foi ile vaiaso, latou te galulue faatasi, e asiasi i aoga ma ia ave e laua nei se feau mo tamaiti aoga, ina ia alofia le olaga faakegi, e lē lelei.
Na ta‘ua e Iafeta, e ui lava ina ua asoa ona tetea ma si ona atalii ona o le maliu ma le oti, ae tumau pea le tiga alofa. O aso uma foi e vaai atu ai isi ana fanau laiti e mafatia pea le loto. “O aso uma lava na o Papa, Papa, Papa lava lea e valaau e si a‘u fanau, ua lē toe valaauina Dad, e lagona ai lo‘u mafatia alofa isi a‘u fanau.”
O le saunoaga lea a Iafeta, ae na ia ta‘ua foi, o le fiafiaga sili lea i lona loto o taimi e taaalo ma mafuta ai ma le fanau a Sio ua oti, ae ua tuu nei i lana tausiga.
