Ole Aso Faraile ole vaiaso nei e alu ai le malaga Paia ale Susuga ile Toeaina, Reverend Opapo ma lona alo o Toaipuapuaga, ole toalua ole tamaitai ma lo la alo. Ole poloaiga mai le lagi, lona 42, ina ia malaga uma atu Toa ma lona toalua ma lona tamā i Roma. Ile faamatalaga ale Susuga Opapo, ua faamatuu mai ia ele toeaina e alu. Ma ua usitai lava foi ina ia alu.
Na saunoa le faifeau toeaina i ona lagona, “E tatau lava ona ou alu, oute usitaia le mea ua finagalo iai le Alii. E lē faigofie le mea nei.” Ua tapena foi lona loto mo nisi faaaliga ua faaali ane e Toa, e iai foi isi faaaliga e tutupu ile taimi ole a latou malaga ai.
Pau lea ole aso 18 o Tesema e tatau ona faalauiloa ai, peitai e lē o iloa le taimi ole aso. “Ua ou fiafia, ole a ave uma lava lavalava na faaaogā e Toa.”
E oo lava i ata na tapue o taimi na tutupu ai faaaliga, ua uma ona tapena ile hard drive a ave ai.
Ole vaveao ole Aso Toonai, e taunuu ai i Aukilani ma malolo ilo latou aiga i Magele faatoa malaga ese ai ile po mo Dubai ma o atu ai i Roma.
Ole isi fiafiaga tele ile toeaina ona ua taunuu lava le latou malaga, ona ole tele o tagata na faalogo iai e lē o talitonuina le mea na tupu, peitai o lea lava ua taunuu, ua uma ona faia a latou bookings, ma ua tele foi mea ua faamaonia. Ua maua foi tala, ua faatali mai le latou faigamalaga i Roma.
Fesoasoani le malo male ekalesia Katoliko ile faigamalaga
O faaaliga uma lava ia na taunuu, ua oo atu nei ile 44, ole faaaliga lona 43, na faaliliu ma iloa ai ole Palemia male malo, latou te tapena le faamoemoe. Peitai ole tele o faaaliga e lei faaliliuina, masalo e na ose 20 faaaliga ua uma ona faaliliu, e pei o faaaliga faanatinati, e iai le 42 male 43 na avatu lava ile tagata i Niu Sila e iloa le gagana Eperu ma faaliliu mai ai.
Ile faatalanoaga ale alii Palemia e uiga ile mataupu lenei, na ia saunoa, ole mea nate silafia e manuia ai Samoa e nate faia. O isi faaaliga e lei faaliliua, e aofia ai le faaaliga lona 44.
Peitai sa iai foi le faaaliga na tupu ile masina o Iulai, na atagia ai le nuu ole toeaina o Lalomalava i Savaii, ile masina o Iulai. E lei liliu uma faaaliga e pei ona faamatala ele Susuga Opapo, oloo teu uma lava e avatu i Roma.
Ole taulaga a Opapo ma lana fanau ile Ekalesia Katoliko
“E lē aogā ona ou mafaufau ini lotu, ae ia ou vaai ile feau. Pau le mea oute manao ai, ia faataunuu le mea o finaglo iai le Alii.
Ua foai atu la’u fanau e auauna atu ai iina. O la’u taulaga lena ina ia faataunuu poo fea lea e finagalo iai le Alii.
Ole sauniga faapitoa na faatino ai lea osiga taulaga, na taitaia ele Afioga a Patele Takito Fidow ile malumalu Katoliko o Siufaga Falelatai ile 6:30 taeao ole Aso Toonai, 24 Setema 2016.
Ua talia ma faamaonia ai le avea ma tagata tapuai ale Ekalesia Katoliko Roma le tamaitai o Toaipuapuaga ma lona toalua, Patrick Ah Chong ma lo la alo, le tamaitai o Fe‘i.
