Ina ua tauaao atu i le alii o Vaituutuu Jr Laauoleola lona tusipasi e faamaonia ai le faaiuina manuia o lona taumafai i se faailoga, e iloa i ana upu le agaga o se talavou ua faagaeetia ma faafetai a‘e i le Atua, ona ua talia lelei le tele o tausaga o le olaga tauivi ma le lē faalogologo tiga.
I sana faamatalaga na faaoo mai i le ofisa o le nusipepa, na agai ni ona lagona i le tulaga o le tau poo seleni o loo totogi ai aoaoga.
E tusa ua 10 nei tausaga talu ona nofomau Vai i Niu Sila, ma ua atoa nei le 21 o ona tausaga. E pei ona ia faamatala mai: “Sa tāua ia te au lo‘u nofo i lenei atunuu.
Na amata mai la‘u agoa i Ferguson Intermediate School i le tausaga e 2000, faasolo ai ina ou alu atu i le aoga tulagalua, Kaitaia College ma faaiu ai i le kolisi o Tangaroa.”
“Sa faigata tele na vaitaimi i le lē lava o le faasoa a le matou aiga. E iai taimi ou te alu i le aoga e leai sa‘u lunch.
E oo i meaaoga ma nisi tulaga, sa le mafai ona lava ai le faasoa. Sa ou taumafai lava ma onosai, ou te iloa sa iai lo‘u faamoemoe i le lumanai.
“Ina ua oo la‘u aoga i le vasega 12 sa faigata lava. Ua ou mafaufau i tupe, ona avea lea ma mea sa ou tuua ai le aoga ae ou alu o‘u faigaluega i se fale la‘u meafale. Faapea lava a‘u o le sa‘o lea, ae na matuā sili le mamafa o le galuega.
“Sa tāua le faamalosi a si o‘u tamā ina ua ou toe foi i Samoa e asiasi. Fai mai lana tala, ‘Son e le aogā na tupe, ae a lē faatumu muamua lou mafaufau, ona sili atu lea ona tele isi tupe e te maua. E talanoa lava le fasi pepa,’ ae sa‘o a si o‘u tamā.
Na ou toe foi loa lea ua faauma lau tausaga mulimuli i le kolisi o Tangaroa i le 2007. Na faapena ona maua ai se sikolasipi $7,500 i le Raffles College of Design i Aukilani.”
E lua tausaga na aoga ai le alii o Vai i lena course, ma o le Aso Faraile, aso 12 o Mati 2010, na faauu aloaia ai loa o ia ina ua faamae‘a ana aoaoga i lea mataupu.
Sa maua lona tusipasi i le Diploma of Graphic Design. Na ia ta‘ua, e na o ia lava le tamaititi Samoa i le latou tausaga, ae sa tele i tamaiti mai isi atunuu i fafo e pei o Sri Lanka, Initia, Fiti, Rusia, Saina ma tamaiti papalagi.
Lea ua mafai (approved) le Degree/Bachelor i lea aoga, ma na ia faafetaia ai le Atua ona ua iu manuia lona taumafai.
O le agaga o le faasoa mai a le alii o Vai, o lona fia faailoa atu o lenei tulaga manuia ua ia ausia, ina ia mafai ona fesoasoani ai foi i alo o le tatou atunuu, o ē ua amata ona tau faavaivai ma faamaamulu mai aoaoga.
Fai mai lenei alii talavou, “tatou te mafaia mea uma pe a iai le loto ma le mafaufau tonu, ma tuu i le Atua o tatou manao na te talia mea tatou te valaau atu i ai, pe a sa‘o a tatou filifiliga.”
E ioe foi Vai, e tāua tele le aua ne‘i galo ia fanau talavou la tatou aganuu ma lo latou tupuaga; e avea lea o se luitau ina ia le fiugofie ae ia tauivi pea e saili se lumanai manuia e ala i le faauma lelei o aoaoga, a o maua le avanoa. E iai le faanaunauga o lenei talavou pe a sologa lelei pea mea uma, e fia faatū sana pisinisi i Samoa, e fesoasoani ai foi i lona aiga, aemaise le atinae o Samoa.
